Imphal, Rymphang:
Ki bor pahara ki la kem ïa 10 ngut ki lehnoh kiba donkti ha ki kam dawa pisa bad ki kam runar ha kylleng ki distrik jong ka Manipur Imphal East bad Thoubal, la ïathuh ki pulit ha ka sngi Saitjaiñ.
Ha ka jingkhynra kaba jur, saw ngut ki dkhot jong ka seng Komunist Kangleipak (Noyon) ba la shah ñiew beaiñ ki la shahkem ha ka sngi Thohdieng na ka thaiñ Heirok Part 2 Chingdompok.
Kine ki briew ba la shahkem ki dei ba la tip kyrteng kum u Laikhuram Sanatomba Singh (22), u Lourembam Suraj Singh (26), u Thokchom Thoithoinganba Meitei (22), bad u Heikhrujam Ngongo (34), la kynnoh ruh ba ki dei kiba donkti ha ki kam rahbor bad dawa pisa na ki paidbah, ki heh sorkar, bad ki jaka die umphniang kali.
Kawei pat ka jingkhynra ha Khabeisoi, Imphal East, ka la pynlong ban kem ïa ki saw ngut ki lehnoh kiba don jingïadei bad ka KCP (PWG).
La ïathuh ba katei ka kynhun kaba la ithuh kum u Lanpoklakpam Sanathoi Meitei (23), u Sanabam Amitkumar Singh (40), u Seram Prem Singh (49), bad u Md. Ithem (55), la ïathuh ba katei ka kynhun ka dei kaba donkti ha ki kam dawa pisa kaba ïasyriem bad ki nongtrei jong ka KCP (Noyon).
Ha ka jingkhynra ba kyrpang ha Nungoi Awang Leikai, Imphal East, ki pulit ki la ïoh ban kem ïa u Okram Aboy Meitei (37 snem), u dkhot jong ka UNLF (Pambei). La kynnoh ba u dei uba donkti ha ka kam dawa pisa bad kit tiar ialeh hapoh bad sawdong jong ka nongbah Imphal.
Ki bor pynïaid ki la kurup ruh ïa ka suloi .32 kaba la thep lai tylli ki kuli ba im na u.
Nalor kane, ki bor pahara ki la ïoh ban kem ïa u Moirangthem Alexander Singh ba la tip ruh da ka kyrteng kum u Satpa (22) uba dei u dkhot jong ka kynhun G-5 kaba hap hapoh ka PREPAK, na Luwangsangbam hajan ka Liberal College Gate kaba hap hapoh ka Heingang Police Station, Imphal East.
La kynnoh ba u dei uba dawa pisa na ki kali kit mar kiba ïaid ha surok National Highway-2.
Ki heh pulit ki dang bteng ïa ka jingkhynra ïa ki kynhun lehnoh kiba donkti ha ki kam dawa pisa bad ki kam beaiñ ha kylleng ka jylla Manipur.
