Bengaluru, Rymphang:
Hangne u don u MLA uba dei ruh u doktor. Bad kane ka la wan kum ka jingkyrkhu ïa ki paidbah ka Kudligi konstitwensi ha Vijayanagara distrik. U MLA ka thaiñ, Dr NT Srinivas uba dei u doktor batbit ha ka liang ka shkor, khmut, bad ryndang ne (ENT), u la sumar ïa palat 6 hajar ngut ki briew haduh mynta ha ki jingïalang paidbah jong u. Baroh ki long kiba laitluid. Haduh katta katta ba ki jingïalang paidbah jong u mynta ki sdang da kaba pynbna, da kaba kylli ïa kba leit ïashim bynta lada don mano mano ba donkam jingsumar.
U Srinivas u dei u doktor jong ka tnad sumar (MD) bad u la trei ha ka jaka pule ba pawnam jong ka All India Institute of Medical Sciences (AIIMS) kaba don ha New Delhi.
Lada don napdeng ki nongpang jong u kiba donkam ban shah sumar shuh shuh, u ai jingmut ïa ki sha ka AIIMS, ha kaba u tip shibun ki doktor bad ki nongtrei.
U la ong ha ka kotkhubor The New Indian Express, “Ka dei ka kabu kaba khraw ïa nga ban shakri ïa ki paidbah kum u nongmihkhmat jong ki bad kum u doktor jong ki. Ka ailad ïa nga ban pynbeit ïa ki jingeh kiba ïadei bad ka konstitwensi bad kumjuh ruh ïa ka koit ka khiah jong ki. Shwa ban sdang ka jingïalang, ka kynhun jong nga ka pynbna da kaba kylli lada don mano mano napdeng ki nongpeitkai kiba pang jingpang. Nga peit ïa ki, bad nga ai dawai. Ngi ai dawai ruh ha ka jaka. Ki tymmen khamtam ki wad ban shah sumar ha nga.”
U la ong, “Nga don shibun ki jingïakynduh ha baroh ki hospital jong ka AIIMS. Palat 200 ngut ki briew na ka konstitwensi jong nga ki la shah sumar ha AIIMS. Nga ju leit sha ki hospital sorkar bad peit bniah ïa ka jinglong jingman jong ki bad ki dawai kiba don hangtei.”
U Amarnath T uba dei u nongshong shnong ka Kudligi u la ong, “U MLA jong ngi ban long u doktor ka long shisha kaba bha na ka bynta jong ngi. Ki briew ki shah sumar ha ki jingïalang paidbah ne ki prokram ba u la buh. Kumjuh ruh, ki dawai ki ai ha ngi.”
