Bengaluru, Rymphang:
Ha shwa ban leit rah ïa ka mang tyngka jong ka jylla, u Myntri Rangbah ka jylla u Siddaramaiah u la khot ïa ki jingïalang bad ki kynhun nongrep bapher bapher ha ka lah sngi U Blei ha Bengaluru. U Siddaramaiah u la ïathuh ha ki ba ki nongrep ki dei kiba kongsan tam bad ba ka kam rep ka ai shibun ki kam. U Myntri Rangbah u la pynthikna ïa ki ba yn sa bishar ïa ki jingdawa jong ki.
U la khot jingïalang bad ki heh tnad bapher bapher ha kine ki bun sngi ba la dep. Ha ka Lah Sngi U Blei, u la ïakynduh ïa ki nongïalam jong ka kynhun ki nongrep. Haba kren sha ki nongthoh khubor, u Siddaramaiah u la ong ba u la sngap ïa ki jingeh bad ki jingai jingmut jong ki. “Da ki jingduna jong ngi, ngin kynthup lang ïa ki jingai jingmut jong ki,” u la bynrap.
Shuh shuh, u CM u la ong ba ka sorkar jong u kam shym la kynran dien, ha kaba ïadei bad ka jingpynneh ïa ka bha ka miat jong ki nongrep ha Karnataka. “Ngin long beit kiba kyrshan ïa ki nongrep bad ka mang tyngka jong ngi kan long kaba kyrshan ïa ka rep ka riang bad ka jingpynroi ïa ka,” u la bynrap. U Siddaramaiah u la bynrap ba bun ki briew ha Karnataka ki shaniah ha ka rep ka riang, bad ïa ka mang tyngka yn wanrah da kaba pyrkhat ïa kane.
