Jammu, Rymphang:
Ki bor pahara ha ka sngi Palei ki la pynjlan ïa ka jingker bad jingkhynra sha ki jaka bathymmai hajan u Line of Control (LoC) ha ka Sunderbani Sector jong ka Rajouri distrik jong ka Jammu & Kashmir ban beh krad ïa ki lehnoh kiba la siat ïa ka kali jong ki shipai ha ka sngi ba la dep, ong ki heh sorkar.
La sdang ruh ïa ka jingkhynra ka bathymmai ha Dayalachak hajan u khappud jong ka pyrthei ha ka bynta jong ka Hiranagar jong ka distrik Kathua hadien ba ki bor pahara ki la bat ïa kawei ka Frequency Wireless set kaba suba, la ïathuh ki heh sorkar.
Kawei ka kali jong ki shipai ka la shah siat ha ki riew lehnoh kiba la suba ba ki rieh ha kawei ka jaka khlaw hajan ka shnong Phal ha ka thaiñ Sunderbani ha ka sngi Palei, kaba la pynlong ïa ka jingkhynra kaba jur da ki shipai bad ki pulit.
Ka jingkhynra ka dang bteng ha Phal bad la pynjlan sha ki jaka thymmai mynta ka step ban pynkhuid ïa ki lehnoh kiba buhrieh, la ong ki heh sorkar bad bynrap ba ym shym la don kano kano ka jingiakynduh bad ki lehnoh haduh mynta.
Ki la ong ba ki bor pahara ki pyndonkam da ki kor ki bor kiba thymmai tam, ki Drone bad ki ksew sma dien ïa ki lehnoh ha ki khlaw barben.
Ha ka jingthoh ba la buh ha ka rynsan X ha ka sngi Palei, ka kynhun shipai kaba don ha Jammu, ka White Knight Corps, ka la ong, “Ki lehnoh, ki la siat ïa ka kynhun shipai jong ka India, ha Sunderbani, Akhnoor, ha ka sngi Balang. Ka jingïasiat kam shym la ktah ïa ki shipai jong ngi hynrei ka la ïaid beit. Ki la don kumba katto katne ki lad pathai khubor kiba la pynbna lamler ïa ki khubor ba la don ki shipai kiba la ïap ha kane ka jingjia. Kane ka dei ka jingpyntip ba bakla.Ka jingkhynra ha kane ka sngi ka dang ïaid shakhmat ban pynduhjait ïa ki nongleh kam sniew,” ka la thoh.
Ki lehnoh ki la siat ïa kawei ka kynhun shipai jong ka kynhun Indian Army ha Sunderbani, Akhnoor, ha kane ka sngi.
Katto katne ki nongpynbna ha Social Media ki pynpaw lamler ba ki nongshah pynmynsaw ki dei ki shipai jong ki. Kane ka dei ka jingpyntip kaba bakla bad kaba la mut lypa.
La sdang ruh ïa ka jingkhynra pyrshah ïa ki lehnoh ha Gurah Baldara bad ki shnong ba marjan ha Dayalachak ha ka thaiñ Hiranagar hadien ba la bat ïa kawei ka Frequency Wireless set kaba suba da ki bor pahara.
U Senior Superintendent of Police, u Kathua Shobhit Saksena bad ki heh shipai bad ki bor pahara khappud ki la pynlong ïa ka jingïalang ha Police Station Hiranagar hadien ka jingthut jong ki Wireless.
Ka jingkhynra ka dang ïaid shakhmat, katba la thaw ïa ki kynhun peit bniah ba kyrpang ha ki lynti bapher bapher, la ïathuh ki heh shipai.
