Shillong, Lber 04
Ka Meghalaya Muaythai Association (MMA) ka la wan shakhmat ban pynbna ïa ki 10 ngut nongïalehkai ban mihkhmat ïa ka ri India sha ka “IFMA Senior Men’s & Women’s World Muaythai Cham-pionship Elite & U-23” ka ban sdang naduh 22 tarik u Jymmang haduh ka 1 tarik u Jylliew 2025 ha Kemer Antalya kaba ha Turkey.
Kine ki kynthup ïa u Bansahnamkyrpang Warkhyllew (U23 Yrs 45 kg), Andrew Maring (U23 Yrs 51 kg), Pynnehbor Mylliemngap (Elite 48 kg), Alandonald Kharthang -maw (Elite 51 kg), Silvestar Ingtih (Elite 63.5Kg) & Aris Syiemsas (Elite 54 kg). Ha ka liang ki kynthei ki long ka Mary Christine Wriang (U23 Yrs 45 kg), Anita Rai (U 23 Yrs 48 kg), Aibyntalin Kharumnuid (U23 Yrs 51 kg) bad ka Soosy Phawa (U23 Yrs 54 kg). katba u Bah Angelus Sun kum u Referee & Judges.
Katkum ka jingïathuh na u President ka Megha-laya Muaythai Associa-tion (MMA), Bah Anjelius Sun, la ong ba ka jinglut jingsep na ka bynta 10 ngut ki nongïalehkai ki ban leit sha katei ka lympung kan long haduh T. 22,98,446 tyngka. “Kumba ngi la dep ban phah da ka jingthoh sha u Myntri Rangbah bad kumjuh sha u Myntri ka tnat ïalehkai ka Sorkar Jylla, ngi buh ka jingkyrpad ba kan plie lad na ka bynta kine ki nongïalehkai ki ban leit shim bynta sha katei ka lympung.”
“Haba ngi leit shim bynta shabar ri, ngim ju wanphai thylli bad ngi ju wanrah beit ïa ki takma bad kane ka pyni ïa ka jingtrei shitom ki khynnah. Te kumta ha kane ka kynti kaba mynta u snem ruh ngi khmih lynti ban wanrah burom na ka bynta ka ri hi baroh kawei.”
“Ngi pynpaw ka jingsngewnguh ïa ka Sorkar Jylla lyngba ka tnat ïalehkai kaba la sam ïa ki khusnam pisa sha baroh ki nongïalehkai bapher bapher bad ki la don haduh 192 ngut ki nongïalehkai jong ka Meghalaya Muaythai kiba la ïoh ka jingïarap pisa halor ki jinglah jong ki ban wanrah burom na ka bynta ka Jylla hi baroh kawei,” u la bynrap.
