Kum ki jingïaseng lang jong ki balang Khristan ruh ki don kiba ai jingmyntoi bad ki bym myntoi ruh. Ki jingmyntoi ba ngi ïoh ki long namar ki hikai ïa ki para bangeit ban shakri bad ïalam ïa ki dkhot ban long kiba tip-briew tip-blei. Ki ïarap ruh ban pynbna ïa ki khubor ba bha sha ki riewngeit baroh. Ki ïa synñiang ban thied ïa ki lum jingtep ban ïoh tep ïa kiba ïap jong ki para bangeit baroh. Ki seng de ïa ki skul ban ai jinghikai ïa ki para briew ban nang thoh nang pule bad ban nang ban stad.
Ki ïalap de ba ngi ban im hok ïaid hok bad ban kiar na ki kam sniew kam smeh. Ki bym myntoi ruh ki don ha ka rukom leh niam leh rukom ha ki kynhun balang. Ki bym myntoi ki long namar ba ki hikai ban ym pynïadei bad ka jingim jong kane ka pyrthei bad ki pynsngew ïapher niam. Ki shim ba ka niam ne balang jong ki ka long kaba bha bad ka jong kiwei ka bym dei. Nangta ki don da kiba pynïaid bakla ïa ka pisa ne ka fund jong ka balang. Shuh shuh ki hikai ba ynda la iap kin ioh leit baroh sha bneng kata ka hima u Blei, ban ioh lait im.
Ki hikai de baroh ki bym hok ne ki ‘riew pyrthei kin leit sha dujok bad kiba hok kin ïoh leit sha ka khet u Blei ha bneng. Hynrei ka ktien u Blei ka ong, u briew um lah ban ïoh diang eiei ruh em lymda la ai ha u na beng (Ioannis 3 : 27). Ka jingim khristan kam lah ban pyllait ïa ngi na ka pop. Bad dei tang kiba khuid ha ka dohnud kin ïoh ïa u Blei. (Mathaios 5 : 8).
C. B. Iawphniaw
