Aizawl, Lber:
U Lat ka jylla Mizoram, Vijay Kumar Singh, PVSM, AVSM, YSM (Retd), u la hiar sha Siaha ha ka sngi Thohdieng ban sam ïa ki Smart Board sha 6 tylli ki skul hapoh ka distrik kum shi bynta jong ka jingthmu jong ka Smart Classroom. Ïa kane ka projek la bei tyngka da ka Numaligarh Refinery Limited (NRL) hapoh ka prokram jong ka Corporate Social Responsibility (CSR) ha kaba la pyntreikam da ka ITI Ltd bad ka Living Thoughts Organisation. Mar ïa poi ha Siaha District Helipad ïa u Lat la ai khublei da u Deputy Commissioner V.L. U bah Hruaizela Khiangte, u DIG ka Southern Range u Altaf Khan, bad kiwei ki heh ki haiñ. La pynlong ïa ka jingrakhe burom ha Circuit House shwa ba u Lat un sam ïa ki Smart Board bad pynlong ïa ka jingïakren bad ki heh sorkar pdeng, ki bor pynjari aiñ, bad ki nonghikai.
Ki skul kiba la ïoh ïa ka Smart Board ki long ka Phura High School, Z.M. High School, Border High School, Siasi Middle School, Theiva Middle School, bad Lopu Middle School. Hashwa ki la don kumba 14 tylli ki skul ha Lawngtlai distrik kiba la ïoh ïa ki Smart Boards.
