Chandigarh, Lber:
U K Appala Naidu, MP jong ka Telugu Desam Party (TDP) Lok Sabha na Andhra Pradesh, u la pynbna ba ki longïing kiba don i khun balai ha ka konstitwensi jong u kin ïoh ïa ka pisa ba la buh tikna kaba long T. 50,000 na ka bynta ki kynthei lane ka masi bad i khun masi na ka bynta ki shynrang, ong ka lad pathai khubor.
U nongthaw aiñ jong ka Vizianagaram u la pynbna ïa kane ha ka jingthmu ban kyntiew ïa ka jingbun briew, da kaba ong ba ka Fixed Deposit kan kiew sha ka T.10 lak ha ka por ba ka khun kynthei balai kan poi sha ka rta ban shongkurim, la bynrap shuh shuh ka khubor.
“Lada u khun balai u dei shynrang, ngin ai kawei ka masi bad i khun masi. Kan buh ïa ka pisa kaba T. 50,000 lada i khun balai i dei kynthei. Ka jingbun paid jong ki nong India ka hap ban kiew,” ong ka tyllong khubor kumba la kren da u Appala Naidu.
U Naidu, u la ong ruh ba u la ïoh mynsiem na kiba bun ki kynthei ha ka jingim jong u bad ka saiñ pyrthei kiba don shadien jong katei ka rai jong u, kaba la ithuh ba u la pynmih ha ka sngi rakhe kyrpang ïa ka Women’s Day, kynthup ïa ka kmie, ki para kynthei, ki kurim, bad ki khun kynthei jong u.
U MP u la kdew ruh halor ka jingshah lehbeiñ ki kynthei ha ka imlang-sahlang bad ban jur ba ka jingpynshlur ïa ki kynthei ka dei ka jingdonkam jong kane ka por.
Kane ka jingpynbna jong u ka long hadien katto katne sngi ba u Myntri Rangbah ka Andhra Pradesh u N Chandrababu Naidu u la ong ba u ngeit ba ka jingbun briew ha India ka dei ban kiew bad ki mat jong ka jingpynbeit pud bad ka jingpynïaid ïa ka jingbun briew kim dei ban don jingïadei.
Ha ka sngi Balang mynshem taïew, u N Chandrababu Naidu u la ong ba ka jingpyrkhat jong u halor ka jingbuh jingkynmaw ïa ka longïing longsem ka la kylla. “Ka Sorkar India lane ka Finance Commission ka dei ban kyntiew ïa ka jingbun briew. Wat pynshitom ïa kito kiba don jingeh ha ka jinglong tymmen mynta. Ai jingkyrshan na ka bynta ki khynnah kiba kham bun,” u la ong.
Ka long ka jingkyrshan kaba kongsan ban pynkupbor ïa ki kynthei. U la kdew sha ki “jingeh jong ka jing-long tymmen” kiba la sdang ha ka thaiñ Shatei jong ka ri India bad u la pynshai ruh ïa ka nongrim jong u halor ka jingpynïaid ïa ka jingbun briew. U la ong ba lada leh hok, ka jinglong jingman jong ka ïoh ka kot jong ka ri India kan neh.
Haba pynshai ïa ka rukom treikam jong u shaphang ka jingbun briew, u la ong, “Ngam shym la ong ka jingpynroi ïa ka jingbun briew, hynrei ka jingpynïaid ïa ka jingbun briew. Lada phi leh ïa ka jingpynïaid ïa ka jingbun briew, ka jingpynneh pynsah ïa ka ioh ka kot kan don hangta, bad ki nong India kin leh ïa ka kam kaba khraw.”
