Chennai, Lber:
Katba ka kynhun samla jong ka DMK ka la pynlong ïa ki jingïalang paidbah ha baroh 234 tylli ki Assembly konstitwensi naduh kine ki khyndiat sngi ba la dep pyrshah ïa ka polisi kren lai ktien, ka jingpynbeit pud, bad ka jingbym ïahap ha ka jingïasam pisa bad ki jylla, ka bor synshar jong ka seng mynta ka la pynbna ban pynlong ïa ka jingïalang kaba kum kane ha ka 12 tarik, u Lber.
Ïa ki jingïalang paidbah yn pynlong da ka kyrteng – Ka Tamil Nadu kan ïakhun, ka Tamil Nadu kan jop.
Ki nongkren kin pynleit jingmut ha ki jingbymlah jong ka sorkar Modi ha ka polisi bad kin kren shaphang ki ‘jingthmu thmu’ kiba don shadien jong ka jingpynbeit pud bad ka polisi lai tylli ki ktien. Baroh ki MP bad ki MLA kin ïashim bynta ha ki jingïalang.
Ki nongïashim bynta ha ki jingïalang kin shim ïa ka jingsmai ‘Kawei ka Thong’ ba la ai da u Myntri Rangbah ka Jylla MK Stalin ha ka sngi kha jong u – ban pyrshah ïa ka jingpynbor ïa ka ktien Hindi bad ban ym pyndem ïa ki jingmyntoi bad ka lawei jong ka Tamil Nadu.
Haba kren shaphang ki jingïalang paidbah ba la pynlong da ka seng samla, u Deputy Secretary jong ka DMK u S Joel u la ong, “Kine ki jingïalang ki shakri ïa ar tylli ki jingthmu – ban pynsngew ïa ki nongrim jong ka seng sha ki pateng kiba dang thymmai bad ban hikai ïa ka kynhun ki samla ha kaba pynlong ïa ki jingïalang, ban trei ha ki jaka ba shapoh bad ban pynkhih ïa ki briew. Kine ki jingïalang ki thew nyngkong eh ïa ki pateng kiba dang thymmai bad ki pynkiew ïa ka jingsngewthuh hapdeng jong ki balei ba ka jingbuh ïa ka ktien Hindi ka long kaba ma ïa ka Tamil Nadu.”
“Kine ki jingïalang kin don ïa u nongkren ba kongsan na ka seng bad u nongkren ba ar na ki nongkren ka kynhun ki samla ba dang shu jied thymmai, kiba kham bun ki dei ki samla pule”, u la bynrap.
