Chennai, Lber:
U Superintendent of Police u S S Maheswaran u la thaw ïa lai tylli ki kynhun ba kyrpang ban kem ïa ki runar ha ka kynhun ba ki don kiba la rung jubor ha kawei ka ïingsah kaba don hajan Kovilur, Nallampallai bad lute palat 100 tylli ki pansngiat ksiar bad T.1.5 lak tyngka.
Katkum ka tyllong khubor ba la ïoh la ong ba ka D Sherlin (44) kaba trei kum ka nonghikai ha kawei ka skul ba ïoh jingkyrshan na ka sorkar hajan Kovilur ka sah bad ka kmie jong ka. Dang shen ka la leit sha Vellore ban shah sumar. Ha ka sngi Saitjaiñ, ka la wan phai ha ka por miet bad ka la lap ba ki jingkhang ki plie. Hadien ba la tohkit, ka la lap ba kumba 100 tylli ki pansngiat ksiar jong ki jingdeng bad palat 1.5 lak pisa ki la jah.
Mar mar ka la pyntip sha ki pulit jong ka Adhiyamankottai kiba la leit bran bran sha katei ka jaka bad pynlong ïa ka jingtohkit. Ka kynhun khmih bniah ka la lum ïa ki sakhi. U SP u SS Maheswaran, uba la jurip ïa katei ka jaka u la thaw lai tylli ki kynhun ba kyrpang.
Ka shnong Kovilur ka don marjan bad ka surok bah Salem – Dharmapuri – Krishnagiri bad ki nongtuh ki lah ban ïohi ïa katei ka ïing bad ban lute ïa ka.
Ka kynhun ba kyrpang ka dang khmih bniah na ki dur CCTV ha shilynter ka surok bah bad bishar bniah ïa ki dur khnang ban lah ban ithuh ïa ki runar, la ïathuh ki pulit.
