Mumbai, Lber:
Ka mang tyngka jong ka Maharashtra kam ai pisa na ka bynta ki skhim ba kongsan jong ka Mahayuti, kiba la kular ha ka por ilekshon sha ka ïingdorbar thawaiñ.
U Myntri ka tnat pla tyngka u Ajit Pawar u la kam ba ïa ki jingkular yn pyntreikam katba dang don ka pisa.
Ki skhim ki kynthup ïa ka jingpynkiew ïa ka jingïarap pisa man u bnai hapoh ka Ladli Bahina na ka T.1,500 sha ka T.2,100 bad ka jingpyllait ïa ka ram rep.
Ka sorkar ha kaba sdang ka la kular ban pynlut T.46,000 klur na ka bynta kane ka skhim na ka bynta ki longkmie kiba donkam bad kiba armet.
Ha kaba sdang, palat ar klur ngut ki kynthei ki la lah ban ïoh ïa kane ka skhim, hynrei suki suki, la nang pynduna ïa ka jingdon jong ki, da kaba kdew ïa ki kyndon bapher bapher. Hynrei ha ka mang tyngka, ka sorkar ka la mang tang T.36,000 klur pyrshah ïa ka jingkular kaba nyngkong kaba long T.46,000 klur.
U Pawar u la ong ba watla ki la kular ban pynbun ïa ka jingïarap pisa hynrei yn sa leh shen ynda ki la ïoh ïa ka pisa.
