Bertina Lyngdoh
La ju ngeit ba ka kynthei briew ka la kit lypa ïa ka pap ka sang naduh mynba ka don ha kpoh i Mei. Kane baroh ki ong ba ka la hiar pateng na ka Im naba ka la ïaid tam ïa ka hukum u Blei. Kane ka daw lane kane ka jingong, kam lah ban ong pat ba ka kynthei kan hap ban kiar khamtam eh na ki kam bahkhlieh. Ka mynsiem ka kynthei ka kham pher na u shynrang kumjuh ha ka jinglong jingman jong ka. Ka kynthei ka kham stad kloi ha jan baroh ki kam haba ïanujor bad u shynrang. Ka kham ïar ha ka jingmut jingpyrkhat bad ka kham ïohi jngai ïa ka pateng ka lawei. Ka jingeh tyrpeng jong ka ruh ka pher bak na ki tyrpeng u shynrang khamtam ynda ka la poi ha ka rta long-kmie jong ka.
Namarkata, ki kynthei kiba la kynjoh sha ka rta longkmie ki don ki jingkylla ha ki kaba u shynrang ne u longkpa um da don ha u. Ka kmie ka dei ka kmie lane i mei te i mei kumba baroh ngi don ïa kane ka jingngeit. Ka kmie la ka duk ha ka spah, hynrei ha ka mynsiem ka long kaba riewspah na ka bynta ka bha ka miat ki khun jong ka. Namar ba ka ieid ïa ki khun, kumta, ka buh shuwa hakhmat ban ïa kiei-kiei baroh ban bit ban biang ki khun ki kti. Kum ka nuksa, ha shuwa ba kan bam, ka pynbam shuwa ïa ki khun, ha shuwa ba kan mih na ïing ban leit sha ki jingdonkam ka da pynthikna ba ki jingdonkam ki khun ha ïing ki biang, haba ki khun ki la thiah, ka ruh na jingthiah ka thiah peit thiah sngap ïoh ba kano-re-kano kaba sniew kan lap ïa ki, ka da aiti bad ainguh ruh ha u blei ha shuwa ba ki khun kin thiah bad ha shuwa ba ki khun kin khie bad hiar na jingthiah. Te kine ki dei ki katto katne kiba ki kmie ki don ha ki. Lehse kine ki jinglong jingman kim don ha ki katto-katne ki kmie. Kum ïa kiba kum kine, ym lah leh eiei, hynrei hap ban pdiang ïa ki kumba ki long. Lada kat kitei ki kam ba la kdew haneng, ka kmie ka lah, kane ka pynlong ïa ka pyrthei ban klet noh ban klet ïa ka pap ka sang kaba ka don ha ka.
Te namarkata, kum ki khun ki dei ban long ka jingkyrkhu kylla ïa ka kmie kumjuh ïa u kpa uba long ka bynta ba kongsan ryngkat lang ka kmie ïa ka bha ka miat ka lawei ki khun. Bunsien, ka kmie u kpa ki la klet wat ban duwai ïalade namar ki la kham pynleit jingmut ïa ka jingduwai jong ki sha ki khun ïa ka bha ka miat, ka tipbriew tipblei jong ki. Pynkhraw la ka kmie pynkhraw la u kpa ai ka burom sha u blei. Kumta, jan baroh ki kynthei kin hap ban ïaid lyngba ïa kane ka rta. Dei ma ki kiba kham ïit lynti naei bad kumno ban ïoh khaw bad kumno ban kyrda ïa ki khun sha ki kyrdan ka burom ban im ka kyrteng bad sah ka nam.
