Shillong, Lber 12
U Rohit Sharma, u la pynkut noh ïa ki jingkynthoh da kaba u la ong ba un ym pat shongthait na ka kam ïalehkai One Day International (ODI) hadien ba ka India ka la rah ïa ka nam lahduh ha ka Champions Trophy da kaba pynliem ïa ka New Zealand ha ka jingïakhun phainal kaba long ha Dubai International Cricket Stadium.
“Ngan ym pat shongthait na kane ka kam ïalehkai, tang ban pynthikna ban ym don kano-kano ka khubor ka ban saphriang nangne shakhmat,” la ong u Rohit, uba la ïalam ïa ka India sha saw tylli ki jingïalehkai final jong ka ICC trophy, kynthup ïa ar tylli ki nam lahduh.
Hadien ka jingïalang bad ki lad pathai khubor kaba ju long hadien ka jingïalehkai phainal, u Rohit u la shim ïa ka kabu ban pynskhem biang ba un ym jngai na ka jingïalehkai.
“Ka jingthmu ïa ka lawei kam pat don ïa mynta. Kaei kaba dang ïaid, kan dang ïai bteng,” u la bynrap da ong ba u dang ïai don ka jingthrang ha u, kaba mut ba ka jingthmu bad jingsngewtynnad ïa ka jingïalehkai ka dang khlaiñ ha u.
Une u rangïalehkai u la lah ban kamai 180 ron ha ka Champions Trophy, kaba la tam ïa ka 11,000 ron ha ka kam ïalehkai ka jong u. Ha ki 273 tylli ki jingïalehkai jong ka ODI, u la kamai 11,168 ron ryngkat 32 tylli ki century, kynthup ïa lai tylli ki double century.
Ka phang jong ka jingshongthait ka la mih ha ka por ba ïakhun ïa ka Champions Trophy, ha kaba kiba bun ki la antad ba un sa mih noh, kumba u la leh hadien ka T20 World Cup ha Barbados ha u Jylliew jong u snem ba la lah. Mar kumta hi hadien ba u la ïalam ïa ka kynhun u la lah ban pynurlong ban rah ïa ka nam lahduh ha ka T20 World Cup, u la pynbna ba un shongthait noh na ka jingïalehkai T20.
Ka la don ruh ki khubor hamsaïa ba u Virat Kohli un shim ïa kata ka sien jam, hynrei une u kapten barim ka India u la ïalehkai bha ha ka Champions Trophy. U la kamai 218 ron, kynthup ïa ka century, ha ki san tylli ki jingïalehkai. Kum u Rohit, ma u ruh u la pynkut ïa ka kam ïalehkai T20I jong u ha Barbados ha u Jylliew mynshem snem.
