Shillong, Lber 12
Ka AMJ The Boys Amjalong ka la long sa kawei pat ka kynhun kaba la rung sha ka semi final ha ka 24th Kiang Ryngksai Football Tournament ba la pynïaid da ka Dawki Amateur Club hadien ba ka la lah ban pynliem noh ïa ka Nongthymmai SC lyngba ka tie-breaker da 4-2 kol ha ka sngi Balang ha madan ïalehkai jong ka Shing Lamin kaba ha Dawki.
Ha kane ka jingïakhun baroh ar kynhun ki la ïakhaid mar 1-1 kol. Ka Nongthymmai ka la pynkhih jar nyngkong eh lyngba u Lucas Syngkli ha ka minit kaba 18, hynrei shwa ban wai ka AMJ ka la lah ban pynphai kylla lyngba u Damon Pathaw ha ka minit 80 na ka bynta ban ïakhaid mar shi kol. Pynban dei ha ka jingïashut tie-breaker ba ka AMJ ka la lah ban kynjoh sha ka thong.
Lyngba kane ka nam jop ka AMJ The Boys (Amjalong) ka la ïasoh lang ryngkat ka Backstreet J XI (Wahkdait), Nongmadan FC (Pynursla) bad ka Sohkha Shnong Everlasting SC sha ka semi final.
Te kumta ka jingïakhun semi final kaba nyngkong kan long hapdeng ka Backstreet J XI (Wahkdait) pyrshah ïa ka Nongmadan FC (Pynursla) ha ka 20 tarik mynta u bnai ha ka por 2 baje nohphai sngi.
