Agartala, Lber:
U President ka BJP bad u Myntri ka koit ka khiah jong ka sorkar pdeng u J.P. Nadda ha ka sngi U Blei u la kynthoh jur ïa ka sorkar jong ka kynhun Left kaba mynshuwa, da kaba kynnoh ba ka pynmih ïa ka jingïakynad bad ka jingleh be-aiñ. U la pynskhem ba ka Tripura, kaba la long mynshuwa kaba la “sahdak snam” hapoh ka kynhun Left, ka la ïohi ïa ka jinghiar kaba paw bha ha ka kam runar, kaba 30 percent hapoh ka jingsynshar jong ka BJP.
Ha ka jingkren jong ki paidbah ha Swami Vivekananda Maidan ha ka jingrakhe ïa ka jingdap ar snem jong ka samoi treikam kaba ar jong ka BJP ha Tripura, u Nadda u la ong, “Ka Tripura ka la shah bat ha ka jingtieng bad ki kam runar ha ka por ba synshar ka CPM. Hynrei mynta ka sngi hapoh ka jingïalam jong u Myntri Rangbah ka jylla u Professor (Dr.) Manik Saha, ka jylla ka la sdang ïa ka lynti jong ka jingsuk bad jingkiew shaphrang. Ka sorkar BJP ka la trei khlem sangeh ban tei ïa ka Tripura kaba lait na u drok, ban pynthikna ïa ka jingïada bad jingshngaiñ na ka bynta ki briew jong ka.”
Haba pynpaw ïa ka jinglong nongïalam ba pynkylla dur jong u Myntri Rangbahduh ka ri u Narendra Modi, u Nadda u la ban jur ba ka kolshor saiñ hima sima ha India ka la kylla. “Ka sorkar BJP ka trei ban ai jingmyntoi ïa u briew uba khatduh ha ka imlang sahlang. Ka policy jong ngi ka long ban shakri ïa ki paidbah, ym tang ban ïoh bor. Dei na kane ka daw ba hadien 27 snem, ka BJP ka la thaw ïa ka sorkar ha Delhi, bad mynta ka sngi, ngi pynthikna ïa ka jingsynshar kaba bha ha Tripura”, u la ong.
Haba ïanujor bad ka jinglong jingman jong ka saiñ hima sima jong ka Delhi, u Nadda u la ong, “Ka sorkar jong ka Aam Aadmi Party ha Delhi ka la long kaba jur bha ha ka jingbamsap. Ki paidbah ki la sngewthuh ïa kane bad mynta ki la pynlong ïa ka Delhi kaba lait na ka AAP hadien ki snem jong ka jingpyrshang ba jur jong ka BJP. Kumjuh ruh ka Tripura ruh ka la lait na ki jingteh jingkhum jong ka jingsynshar jong ka Left kaba la neh 25 snem, kaba la plie lad ïa ka sorkar kaba pynïaid ïa ka roi ka par hapoh ka BJP.”
U Nadda u la ïaroh ïa ka sorkar BJP na ka bynta ka jingkiew jong ka ha ka liang ki jingtei ha Tripura. “Naduh ki surok bah jong ka ri haduh ka jingpynïasoh Internet, ka jylla ka la sakhi ïa ka jingkylla kaba khraw. Hapoh ka jingïalam jong u Dr. Manik Saha, ka jingkiew ka la nang stet, kaba kynthup ïa ki bynta kiba kongsan kum ka pule puthi, ka koit ka khiah, ka rep ka riang, bad ka leit ka wan ki paidbah.”
Haba kubur ïa ka jingngeit jong ki paidbah ha ka BJP, u la ong, “Ki paidbah ka Tripura ki la pyni ïa ka jingshaniah jong ki ha ka BJP da kaba ki la jied ïa arngut ki MP na ka jylla ha baroh ar tylli ki ilekshon Lok Sabha 2019 bad 2024. Kane ka jingjop ka pynpaw ïa ka jingkyrshan jong ki ïa ka jingthmu jong ngi na ka bynta ka roi ka par bad ka jingsynshar.”
Ha ka jingpynbna kaba kongsan, u Nadda u la pynpaw ïa ar tylli ki skhim jingïarap ba kongsan ba la sdang da ka sorkar Tripura- ka ‘Chief Minister’s Kanya Atmanirbhar Yojana’ bad ka ‘Chief Minister’s Balika Samriddhi Yojana.’
Haba pynshai halor ki jingthmu, u la ong, “Hapoh ka Balika Samriddhi Yojana jong u Myntri Rangbah ka Jylla, kawei pa kawei ka khynnah kynthei kaba kha ha ka longïing kaba shah kynthup ha ka (BPL) kan ïoh ïa ka pisa ba la ïakut kaba T.50,000. Ha ka por ba kan dap 18 snem, kane ka pisa kan kiew sha ka T.10 lak, kaba pynthikna ïa ka jingshngaiñ ha ka liang ka pisa tyngka na ka bynta ka lawei jong ka.”
Kumjuh ruh hapoh ka Kanya Atmanirbhar Yojana jong u Myntri Rangbah ka jylla, yn pynbiang ïa ki 140 ngut ki samla pule ba tbit na ka Tripura Madhyamik Shiksha Parshad, CBSE, bad ICSE board da ki Scooter ban pynsuk ïa ka jingpule jong ki.
Ha kane ka sngi u J.P. Nadda u la pyllait paidbah ruh ïa ka kot lyngkdop kaba pyni ïa ki jingjop jong ka sorkar BJP ha kine ki ar snem ba la dep. “Kane ka kot ka long ka jingpynshisha ïa ka jingshimkhia jong ngi kaba khlem artatien na ka bynta ka jingbha jingmiat jong ki paidbah. Ki paidbah ka Tripura ki la kyrkhu kyrdoh ïa kane ka sorkar, bad ngin dang ïai trei na ka bynta ka jingbha jong ki,” u la pynskhem.
Da ka jingkyrshan kaba khraw na ki paidbah, ki nongïalam ka BJP ki la pynpaw biang ïa ka jingkut jingmut jong ki ban pynïaid shakhmat ïa ka Tripura ha ka lynti jong ka roi ka par, ban pynthikna ïïa ka jingsuk, ka jingroi jingpar, bad ka jingkiew shaphrang na ka bynta baroh ki nongshong shnong.
