United Nations, Lber:
U heh jong ka United Nations ha ka Sngi Balang u la ong ba ka jingpynduna ïa ki lad jingïarap nabar ri jong ka US hapoh ka jingpynïaid jong u President Donald Trump ka la wanrah ïa ka jingthut ha ka kam ai jingïarap sha ki paidbah jong ka pyrthei. U la maham tyngeh ruh ba lada kan iai bteng kumne, bun na ki paidbah nongshong shnong jong kito ki ri kiba duk bad kiba ju ap jingkyrshan na ka US kin sa shu iap ei.
U Tom Fletcher, u khlieh jong ka Ophis ka UN naka bynta ka jingpynïaid ïa ki kam ïarap briew (OCHA), u la antad ba kumba 300 Million tam ki briew ki donkam ïa ka jingkyrshan na ka United States ha kylleng jong ka pyrthei. Hynrei ka jingpynsangeh jong ka US ia ki lad jingïarap sha ki ri jong ka pyrthei, ka la ktah jur ia ka jinglong- jingman ha kitei ki ri kiba ju ioh jingkyrshan na ka US na ka por- sha ka por.
Namar la ong ba naduh ka jingwanphai biang jong u Trump sha ka kam ha u bnai Kyllalyngkot, ka tnat pynroi pyrthei jong ka ri America (USAID) ka la don ha ka jingeh namar ka jingialeh jong ka sorkar u Trump ban pynduna ïa ki jingpynlut jong ka sorkar da kiba bun rukom.
Hadien ba la pynsangeh lut ïa baroh ki jingïarap nabar ri ban bishar bniah, ka tnat kam bar ri jong ka US ka la ong ha ka taiew ba la dep ba kan pynkut noh ïa 83 percent ki jingïateh kular jong ka USAID.
Ha u Nohprah, ka UN ka la antad ba $47.4 billion yn donkam na ka bynta ki jingïarap ïa ki briew ha u snem 2025, watla kata ka pisa ka biang tang ban kyrshan ïa kiba la antad ba 190 million ngut ki briew kiba donkam jingïarap.
