Chennai, Lber:
Ka seng AIADMK, ka la pynlong ïa ka jingïakhih bad mih shabar na ka ïingdorbar jong ka jylla Tamil Nadu, ha ka por ba u Myntri ka tnat pla tyngka u Thangam Thennarasu, u la wanrah ïa ka mang tyngka jong u snem 2025-26 ha ka sngi Thohdieng. Ki nongthaw aiñ jong ka Bharatiya Janata Party ki la ïasoh bad ka AIADMK kum ka jingpyrshah.
U General Secretary jong ka AIADMK bad u nongïalam ka liang pyrshah u Edappadi K Palaniswami u la ong ba ka seng ka la mih noh naduh ba u Speaker u M Appavu u la kyntait ban ai jingbit ban rah ïa ka mat halor ka jingtohkit kaba la sdang da ka Enforcement Directorate, kaba dang tohkit ïa ka TASMAC kaba die kyiad ba la kyrshan da ka sorkar halor ka jingthombor pisa.
Ka Tamil Nadu State Marketing Corporation lane ka TASMAC ka dei ka kompeni kaba dei jong ka sorkar Tamil Nadu.
Haba kren sha ki lad pathai khubor shabar jong ka ïingdorbar thawaiñ ka jylla, u la ong ha ka lad pathai khubor kumne, “Ka ED ka la ong ba ka la don ka jingbamsap jong ka TASMAC kaba palat T.1000 klur. Ka jingtohkit ka dang ïaid shakhmat. Ka lah ban long ba ka la don palat T.40,000 klur ka jingbamsap ha ka TASMAC.”
Ha ka sngi Palei, shisngi shwa ban pyni ïa ka mang tyngka, ka ED ka la pynlong ïa ka jingkhynra ha kylleng ka Tamil Nadu ha kaba ïadei bad ka jingtohkit halor ka jingpynkylla pisa kaba ïadei bad ka jingkynnoh ba ki don ki jingleh bymsuitñiew ha ka TASMAC.
Ka kynhun tohkit ka dang tohkit ruh ïa ka kam ba la kynnoh ba u Myntri u Senthil Balaji u don, la ïathuh ki heh sorkar ha ka lad phah khubor.
Ki ophis jong ka TASMAC, ki nongtrei jong ka, ki ophis jong ki kompeni shna kyiad bad ki karkhana, bad ki “paralok ba ïajan” kiba ïadei bad u Balaji baroh ki dang shah tohkit.
U nongïalam ka BJP u Annamalai u la ther ïa ka sorkar DMK halor ka jingpynshisha jong ka kompeni kyiad ba la pynïaid da ka sorkar, “Ka jingmih na ka jingpynkylla ïa ka Tamil Nadu sha ka ri jong ka jingbamsap bad pynïaid ïa ki kompeni sorkar kum ki jaka pdeng jong ka komishon ka la pynlong ban pynkhlaiñ ïa ka jingwad bniah jong ki ED ha ka TASMAC.”
Ha ka jingthoh ha ka rynsan X u la bynrap, “Ka ED ka la lap ïa ki kot ki sla na ki karkhana shna kyiad kiba ïadei bad ka jingpynmih pisa khlem jingkheiñ kaba T. 1000 Klur, kaba la siew kum ka jingsiew kylliang. Ka DMK ka la pynlong ïa ki paidbah barit paid ban pyndap ïa ka pla jong ka seng jong ki da kaba thok ïa ka rukom treikam, bad u Myntri Rangbah ka TN u MK Stalin u don ka kamram ban jubab ïa ki briew kiba ïoh ïa kine ki jingsiew kylliang. U dei ruh ban kylli ïalade hato u don ne em ïa ka hok kaba don akor ban bteng kum u Myntri Rangbah jong ka TN.”
