Imphal, Lber:
Ha ka jingkhynra lang kaba la long hadien ba la ïoh ïa ka jingtip kaba bniah na ka 46 Assam Rifles (AR) bad ka 2 MAHAR Regiment, ki bor pahara ki la ïoh kurup ïa ka jaka buh tiar bad ki tiar pynbthei ha Wangoo Laipham Awang Chingya bad Warukok Hill range ha ka sngi Ba-ar
Kane ka jingkhynra kaba la pynlong naduh ka por 6:30 baje mynstep haduh 9:15 baje mynstep, la ïashim bynta da ki briew naduh u CDO Unit Kakching, Assam Rifles, BSF, bad 2 MAHAR Regiment, hapoh ka jingpeit ba kyllum jong u Superintendent of Police, Kakching, ka Priyadarshini Laishram, MPS.
Ha ka jingkhynra, ki bor pahara ki la lap ïa kawei ka pla Super PP kaba lieh kaba la buhrieh hapoh ki khlaw, ha kaba ka don kawei ka SMG Carbine, kawei ka Single Barrel Rifle, kawei ka suloi .303 kaba la pynkylla dur, bad kawei ka Revolver kaba la thoh “Made in USA.”
La ïoh kurup ruh ïa ki tiar siat kiba im, ki bom kiba heh bha, ki tiar pynbthei ba la shna kyrpang (IEDs), kawei ka Baofeng Handset, ki tiar pynbthei tdem, bad ki tiar ïaleh pyrshah ha ki jinghiar thma.
Ïa kane ka jingkhynra la ïalam da u DSP (Ops) L. Bedhajit Singh, MPS, bad la khmih da u Addl SP (Ops) Binoy Chongtham, MPS. Ha kane ka sngi la wan ban ïashim bynta ruh da ki Unit na ka 46 AR, 2 MAHAR Regiment, bad 131 Bn BSF.
