Shillong, Lber 16
Kan dei ka sngi ka ban pynsah kynmaw pateng-pakit ba ka Shillong Lajong FC ka la lah ban leh ïa ka kam kaba phylla ban pynliem ïa ka Mawlai SC da 2-1 kol ha ka sngi Saitjaiñ bad ban rah syndon ïa ka nam lahduh ha ka OC Blue Shillong Premier League 2024 ha ka sien basan.
Ha ka jingshisha kane ka nam lahduh ka la dei ban leit sha ka Mawlai namar kam pat shym la mad ïa ka jingshah rem ha khat-hynñiew sien ïakhun naduh basdang kane ka lympung. Pynban da kaba kheiñ sting ha ka jingïakhun pyrshah ïa ka Laitkor (2-2 kol) ha ka Lah Sngi U Blei ka la pynlong ban duh syndon ïa ka hat-trick kumba ka la khmih lynti naduh ba ka lah ban rah ha u snem 2022 bad 2023.
Kumba ka paw ha kane ka jingïakhun kaba khatduh, ka Mawlai ka donkam tang ban shu ïakhaid, hynrei kane ka jingangnud kam shym la urlong na ka daw ka jingïakhun tyngeh ki rangïalehkai ka Lajong hakhmat hajar ngut ki paidbah kiba la wan ban sakhi ïa kane ka jingïa-khun kaba itynnad bad kaba pynhun ïa baroh ki paidbah.
Kane ka jingïoh ban rah ka Lajong ka la wan hadien ba ka la lah ban tam ïa ka Mawlai lyngba ka jingïapher ha ka liang thep kol (goal average) wat la ki la ïoh mar 45 point na khatphra sien iakhun jong kane ka lympung.
Ha kane ka jingïakhun baroh ar kynhun ki la pyrshang ban ïakhun tyngeh naduh kaba sdang bad khamtam eh ka Lajong kaba donkam ïa ki lai point. Te kumta kane ka kynhun hapoh ka jingïalam u Bah Bobby L. Nongbet ka la ïoh ban pynkhih jar nyngkong eh lyngba u Abhay Chettri ha ka minit kaba 10. Kane ka shi kol ka la nang pynïoh mynsiem ïa kane ka kynhun ba kan dang ïakhun tyngeh shuh shuh. Hapdeng kane ka jingïakhun ka Mawlai ka la ïoh ïa ki kabu kiba biang, hynrei kam shym la lah ban pynphai haduh kaba kut jong ka kylla step.
Kine ki kynhun ki la ïakhun tyngeh ha ka kylla miet ha kaba ki la ïoh ïa ki kabu biang, hynrei kim shym la lah ban thep kol. Ha kum kane ka jingïakhun kaba itynnad bha ka Lajong sa shisien ka la lah ban pynbud biang ïa ka kol ba ar lyngba u Samchaphrang Lato (76′). Ha shwa ban wai ka Mawlai ka la lah ban pynphai kylla shi kol lyngba ka penalty ba la shut da u Damanbhalang Chyne (88) ha shwa ba kan mad ïa ka jingshah rem kaba nyngkong eh ha kane ka lympung bad ruh ban pynlong ïa ka Lajong ban rah ïa ka nam jop kaba san naduh ba ka la rah teng ha u 2014, 2015, 2016 bad 2019.
Lyngba kane ka nam jop ka Lajong ka la ïohpdiang ïa ka khusnam pisa kaba T. 6 lak, katba ka Mawlai ka la ïoh T. 3 lak. Ïa ki cheque bad ka trophy sha ka lahduh la sam da u Myntri ka tnat ïalehkai ka Sorkar Jylla u Bah Shakliar Warjri kum kongsan ha ka jingdon lang ki dkhot ka SSA bad kiwei.
U Deibormame uba la lah ban thep haduh 20 kol ha kane ka lympung, u la ïohpdiang ïa ka nam Top Scorer ha kaba u la ïoh-pdiang ïa ka memento na u President ka Meghalaya Football Association u Bah Hamletson Dohling.
Ban kyrshan shuh shuh ïa ka SPL kaba dei ka lympung ïalehkai kaba kongsan jong ka SSA kaba la lah ban sei ïa bun bah ki nongïalehkai kiba kynsai ka Jylla, u Bah Warjri u la aiti ruh ïa ka shithi na ka Sorkar Jylla kaba la mang pisa T.8 lak tyngka na ka bynta kane synjuk. Te kumta na ka liang u General Secretary u Bah Dipshon L Nongbri u la ai khublei ïa u Myntri bad ïa u Myntri Rangbah kiba la bteng ka jingkyrshan ïa ka phutbol na ka bynta ka jingmyntoi jong ka Jylla hi baroh kawei.
Na ka liang ka SSA kan sa sdang ïa ka aïom ïalehkai 2025 da kaba kan pynrung kyrteng ïa ki klob bad ruh ka ‘transfer of players’ ha shwa ban sdang ka U-20 Fourth Division ha u Jylliew.
