Itanagar, Lber:
U Myntri Rangbah ka jylla Arunachal Pradesh u Pema Khandu ba la synran da u MLA na Mebo Oken Tayeng u la pynlong ïa ka jingïalang kaba pynmih jingmyntoi bad ki ophisar na ka Oil India Limited (OIL) ha ka sngi Thohdieng.
Ki jingïakren ki long halor ka jingpynbeit ïa ki jingdonkam ba kongsan jong ki jingtei, khamtam eh ban shna ïa ka jingkieng halor ka wah Taro-Tamak ha Gadum, Lower Mebo Subdivision.
Da ki rukom wad bniah kiba donkam ïa ki NOC kiba bun bad ki jingmynjur ba pura, la pynksan ïa ka jingdonkam ban pynbha ïa ka jingpynïasoh jong ki surok bad ki jingkieng. La bynshet ïa ka tnad Public Works (PWD) ban ai ïa ka jingkyrshan kaba donkam na ka bynta ban pynroi ïa ki jingtei.
U Myntri Rangbah ka jylla u la pynpaw ïa ka jingïaroh halor ka jingshimkhia ba la pyni da ki nongmihkhmat ka OIL, ba kynthup ïa u CGM (Frontier Exploration) u Arunav Baruah, u DGM (Frontier Exploration) Aryama Tiwari, bad u Liaison Officer u Dhananjay Morang. Hapoh ka jingïalam jong u MLA u Oken Tayeng, yn pyrshang ban pynthikna ïa ka jingïaid beit ïaid ryntih jong ka roi ka par ha kane ka thaiñ.
