Thiruvananthapuram, Lber:
Kawei na ki nongtrei ASHA kiba ïakhih, kaba wan na ka thaiñ Kollam kaba marjan, ka la ong ba kin ym pynkut noh ïa ka jingïakhih kaba dang ïaid tad haduh ba ka sorkar jylla kan pdiang ïa ki jingdawa jong ki.
Kumba la sakhi, la ong ba da ki spah ngut ki nongtrei ASHA, kiba la pynlong ïa ka jingïakhih la palat shibnai ban pynbor ïa ki jingdawa bapher bapher, ha ka lah sngi U Blei ki la pynjur ïa ka jingïakhih jong ki da kaba ker kut ïa ka Secretariat jong ka jylla Kerala.
Ka bynta jong ki nongtrei Accredited Social Health Activist (ASHA) ki la pynlong ïa ka jingïakhih hangne ha kine ki 36 sngi ba la dep ban pan ïa ki jingmyntoi hadien ba ki la shongthait bad ban pynkiew ïa ka bainong jong ki.
Hadien ba ki la ïalum lang ha ka jaka ïakhih, ki la leit sha ka jaka synshar jong ka jylla, ki la ïashong sngap jar ha surok bad ki la pyrta jam.
Ki pulit ki la buh ïa ki jingker ha katei ka jaka ban khanglad ïa ki nongïakhih.La pynjur ïa ka jingpahara hapoh bad sawdong jong ka Secretariat bad la pyntreikam palat 800 ngut ki pulit ban khanglad ïa ki nongïakhih ban rung shapoh Secretariat.
“Kumno ngin lah ban rah ïa ka jingim jong ngi shakhmat da kane ka jingïoh kaba rit. Nga long ka riewkynthei bad nga don arngut ki khun bad kawei ka kmie kaba la tymmen ban peit. Ngam lah shuh ban im bad kane ka jingsiew kaba duna ha ka por ba ka dor jong ki marbam ba kongsan ka kiew bha”, ka la ong ha ki lad pathai khubor.
Ha kajuh ka por, ka LDF kaba synshar ha ka lah sngi U Blei ka la bteng ban kynthoh ïa ki nongtrei ASHA halor ka jingkhihwin jong ki bad ka la ong ba kito kiba ïalam ïa ka jingïakhih ki don katto katne ki jingthmu kiba buhrieh.
Ka la pynshisha ruh ba ka LDF bad ka CPI(M) ki ju ïeng ban ïada ïa ka jingmyntoi jong ki nongtrei ASHA bad kata kan dang ïai bteng.
“Ki la dei ban pynlong ïa ka jingïakhih pyrshah ïa ka sorkar pdeng…ym pyrshah ïa ka sorkar jylla”, la ong u heh nongïalam jong ka seng CPI(M) bad u nongpynïaid ïa ka LDF u TP Ramakrishnan hangne.
Ka sorkar LDF ka la kam ba kam shym la ïoh kano kano ka jingïarap pisa na ka sorkar pdeng hapoh ka National Health Mission (NHM) na ka bynta u snem 2023-24 na ka bynta ban siew sha ki skhim bapher bapher ba la kyrshan da ki Centre, kynthup ïa ka ASHA.
Ka sorkar pdeng, pynban, ka la kyntait ïa ki jingdawa jong ka jylla bad ka la kyntait ba ka la ai ïa kaei kaba dei ban ai, hynrei ka jingpynshisha ïa ka jingpyndonkam kam shym la wan na Kerala.Ka la ong ba ynda la wan ka Certificate, yn sa ai ïa ki pisa kiba donkam sha ki nongtrei ASHA bad sha ka jylla.
U Myntri ka koit ka khiah ka sorkar pdeng u J P Nadda u la pynbna ruh hapoh ka ïingdorbar ba ka Mission Steering Group jong ka NHM ka la rai ban pynkiew ïa ka jingai jingkyrshan ïa ki nongtrei ASHA.
