Panama City, Lber:
Katkum ki khubor, la ong ba ka Panama ka dang ïakhun shitom ban pynioh biang ïa ka bor ding ha ka Sngi U Blei hadien ka jinglip bording ha ka por miet kaba la pynlong ia katei ka phang pdeng jong katei ka ri ba kan hap ban shong hapdeng ka jingdum.
Ka jingthut bording, kaba la jia tang khyndiat por shwa ban shiteng synnia, ka dei na ka daw jong ka jingjulor jong kawei ka Generator jong ki riew shimet, la ong U President Jose Raul Mulino.
Ka jingïoh ïa ka umbam- umdih ruh ka la sangeh namar ka jingduh bording ka la ktah ïa ki jaka pynkhuid um, ong ka Institute of Aqueducts and Sewers (IDAAN).
Katkum ka video kaba u Mulino u la pyllait ha ka rynsan ‘X’ ruh, u la kren bad iathuh shaphang ka jingbthei ha kawei ka jaka kaba don shaphang Shathie Lam Mihngi jong ka nongbah Panama.
Kumta, utei u nongialam u la panmap ia ki paidbah ia ka jingbym lah ban tehlakam ia katei ka jingeh ba ka ri ka ïakynduh ha kane ka por, hynrei u la kular ba ki bor pyniaid kin ialeh katba lah ban wanrah biang noh ia ka bor-ding ha ka por kaba biang.
