Shillong, Lber 19
Kan dei lehse ka sien kaba nyngkong eh ba ka Jylla kan ïoh ïa kawei ka stadium na ka bynta ki briew kiba don jingduna ha ki dkhot met ïa kaba la tip kum ka Disability Sports Complex.
Kane ka la wan hadien ba la shim khia da ka Ministry of Social Justice and Empowerment jong ka Sorkar Pdeng ba kan thaw ïa san tylli ki stadium ha kylleng jong ka ri na ka bynta ki briew kiba don jingduna ha ki dkhot met bad ka nongbah Shillong kan long kawei na kita.
Katkum ka shithi ba la phah da u Myntri Rangbah ka Jylla, Conrad K Sangma sha u Dr. Virendra Kumar, Myntri ba dei khmih ïa ka tnat Social Justice and Empowerment, u la ong, “Nga shim ïa kane ka kabu ban ai khublei ïa ka sienjam ba la shim ban thaw ïa ki san tylli ki Centre na ka bynta ki briew kiba don jingduna ha ki dkhot met ha ka ri. Ka long kaba sngew sarong ruh ïa ngi ba kawei na ki Disability Sports Complex kan dei ha ka nongbah Shillong.”
Kane ka jaka kan pyndap ïa ka thaiñ shatei lammihngi ha ka jinglong kyllum bad ïa ka Meghalaya khamtam ha kaba kum kine ki jaka ïalehkai ki long kiba donkam bha. Ha kaba ïa dei bad kane, nga kwah ban kdew ba ka Meghalaya kan pynlong ïa ka National Games ha u snem 2027 bad kum kane ka jaka ïalehkai na ka bynta ki briew kiba don jingduna ha ki dkhot met kan long ka jingnoh synñiang kaba khraw ban pynbiang ïa ki jingdonkam na ka bynta ka National Games,” u la bynrap.
Kumba la dep ban ïakren kham mynshwa bad ka tnad Persons with Disabilities, la mang ïa ka jaka kaba heh 40 akar ha Mawkhanu, Mawpdang kaba ha New Shillong Township (NST) na ka bynta ban shna ïa kane ka jaka ïalehkai bad ïa kane ka jaka lah ban ïaid shakhmat da kaba ïasyllok bad ki ophisar jong ka Sorkar Pdeng.
“Ngi la sngewkmen ba ngi la pdiang ïa ki ophisar katei ka tnad ha ka 13 tarik u Rymphang mynta u snem. Ka jingwan jong ki ka la pynskhem ïa ka jingkitkhlieh jong ngi na ka bynta kane ka projek bad ngi thrang ban ïatreilang bad katei ka tnad khnang ban pynurlong ïa kane ka jingthmu. Nga kwah ban pynthikna ïa phi ba ngi aiti pura ïa kane ka projek bad ba ka Sorkar Jylla kan kit ïa ka jinglut na ka bynta ban pynbeit ïa ka jaka, ban pynbha ïa ka jaka bad ban pynbiang ïa baroh ki jingdonkam na ka bynta katei ka jaka ïalehkai jong kiba duna dkhot met.”
“Te kumta nga pan ïa ka jingkyrkhu jong phi ban mang pisa na ka bynta kane ka jaka ïalehkai na ka bynta ki briew kiba don jingduna ha ki dkhot met sha ka Jylla bad nga pynthikna ïa phi ïa ka jingkyrshan bad ka jingïatreilang kaba pura jong ka Sorkar Jylla ban pyndep ha ka por kaba biang ïa kane ka projek ïalehkai kaba donkam eh,” la bynrap biang u Sangma.
