Patna, Lber:
Ha kawei na ki bynta kaba kham kongsan hashwa ka ilekshon sha ka ïingdorbar thawaiñ jong ka Bihar, ka Congress ka la thung ïa u nongialam jong ki Dalit, u Rajesh Kumar kum u President jong ka Bihar Pradesh Congress Committee (BPCC), ha ka jaka jong u Akhilesh Prasad Singh, uba la bat ïa kane ka shuki naduh u snem 2022.
Ka rai ban aiti ïa u diengduh sha u Rajesh Kumar, uba dei u MLA ba ar samoi treikam na Kutumba ha Aurangabad distrik, la shim ha ka jingïalang jong ki General Secretary jong ka seng bad ki In-charge jong ki jylla, ïa kaba la pynïaid da u President u Mallikarjun Kharge ha ka sngi Ba-ar. Ha kane ka jingïalang la don lang ruh u MP ka Congress u Rahul Gandhi.
Ka jingthung ïa u Rajesh Kumar kum u President bathymmai jong ka Bihar la ïohi ba ka dei ka buit thymmai jong ka seng na ka bynta ka ilekshon sha Assembly ka ban sa long ha u bnai Risaw-Naiwieng mynta u snem.
Uwei u heh nongïalam jong ka seng Congress u la ong, “Ka seng ka kwah ban pynleit jingmut ha ki vote jong ki Dalit ha ka ilekshon sha ka ïingdorbar thawaiñ ka jylla ban wan.”
Une u nongïalam uba kwah ban pynpaw kyrteng u la pynpaw ba u Akhilesh Prasad Singh u wan na ka jaitbynriew Upper Caste Bhumihar, ka jaitbynriew kaba donbor ha Bihar katba u Rajesh Kumar pat u dei u durkhmat bym don jingïakren bad u dei na ka jaitbynriew Scheduled Caste, kaba don kumba 19.65 percent na ka jingbun briew jong ka jylla. Shuh shuh, ka Congress, ka la dep ban pynrung ïa u nongïalam ka kynhun ki samla, u Kanhaiya Kumar, uba dei ruh u nong Bhumihar, ha ka saiñ hima sima jong ka Bihar.
“Ha kane ka kynti, ka jingkylli ban khot ïa ka jingbitar jong ka Upper Caste Bhumihar namar ba la weng ïa u Akhilesh kum u heh nongïalam ka seng ha ka jylla kam mih satia”, la ong une u nongïalam.
Ka jingpynbna halor ka jingthung ïa u President bathymmai jong ka seng Congress ha Bihar, la pynmih da u General Secretary jong ka seng, u K C Venugopal, ha ka sngi Ba-ar.
Kane ka jingpynroi ka wan hapdeng ka ‘Palayan Roko, Naukri Do’ padyatra ba la pynlong da ki samla pule bad ka kynhun ki samla jong ka seng Congress.
Ïa kane ka Padyatra ha baroh kawei ka jylla la ïalam lang da ka AICC Bihar In-charge u Krishna Allavaru bad ka NSUI National In-charge ka Kanhaiya Kumar.
Ki tyllong khubor na ka Congress, ki ïathuh ba u Akhilesh, u pynneh ïa ka jingïa jngai naduh ba la thung ïa u Allavaru, kum u nongpeit ïa ka Bihar bad ïa u Kanhaiya, la shaniah ïa ka kam thymmai ha Bihar.
U Akhilesh, la ñiew ruh ba u dei uba ïajan bha bad u heh duh jong ka RJD, u Lalu Prasad, uba khlem kyrshan ïa ka jingrung jong u Kanhaiya ha ka saiñ pyrthei jong ka Bihar.
Wat la u Akhilesh u la ïashim bynta ha ka Padyatra ba la sdang na ka Bhitiharwa Ashram jong u Mahatma Gandhi ha ka West Champaran district ha ka 16 tarik u Lber, hynrei la shem ba u paw bha da ka jingbym don jong u ha ka jingïalang ki lad pathai khubor jong u Allavaru bad u Kanhaiya ha Sadaquat Do Ashram ban pynbna ïa ka prokram ba la tyrwa.
U Allavaru u la dep maham ban leh tyngeh pyrshah ïa ki nongïalam bad ki nongtrei jong ka seng kiba ïashim bynta ha kaba pynroi ïa ka jingïapher kynhun hapoh ka seng.
Ka jingthung ïa u Rajesh Kumar kum u President ka jylla ka dei ka nuksa.
