Kohima, Lber:
Ka sorkar Nagaland ka la ithuh ïa ki shiphew tylli ki shnong ha ka distrik Kohima kum ki shnong kiba lait na ka jingpang TB, kaba pawnam napdeng ki 58 tylli ki shnong ha ka distrik.
Ka bor synshar ka la ai jingithuh ïa ki shnong na ka bynta ka jingtrei shitom jong ki ha kaba ïakhun pyrshah ïa kane ka jingpang ha ka sngi rakhe ïa ka jingpang TB ha ka pyrthei 2025 ha ka lah Sngi U Blei, kaba la pynlong ïa ka dak jong ka sienjam kaba kongsan ha Kohima.
Da ka jingthmu ban long ka distrik kaba nyngkong eh kaba lait na ka jingpang TB 100%, kane ka jingjop ka la buh ïa ka nuksa kaba khlaiñ ïa kiwei pat ki jylla ba kin bud.
Haba ai jingkren ha ka jingïakynduhlang ha ka ophis treikam jong u ha Kohima, u Deputy Commissioner u B Henok Buchem u la ai khublei ïa ki shnong bad u la kdew ïa ka jingdonkam jong ka jingshimkhia kaba neh ban pynduh jait ïa ka jingpang TB.
U la ban jur ba ka jingkitkhlieh ban pynduh jait ïa ka jingpang TB kam shong tang ha ka sorkar bad ki nongtrei ka koit ka khiah.
Ka dei ka jingpyrshang lang ha kaba uwei pa uwei u briew bad kawei pa kawei ka shnong ka don ka bynta ban leh. Kane ka jingpang mynta ka long kaba suk bad tikna ban pynïoh ïa ka jingkoit lada phah sumar ha ka por ba biang bad dih tista ïa ki dawai kumba la bthah. Kane ka jingpang mynta ka la kham duna ka jingsaphriang namar ba ki briew ki la sdang ban shemphang kumno ban sumar bad kumno ban ïoh ïa ki jingsumar ha kylleng ki jaka bad kumjuh ban ïoh ki lad jingïada.
U Buchem u la kyntu ïa kawei pa kawei ka shnong ban shim jingmut na ki 12 tylli ki shnong ba la ithuh bad ban aiti ban pynlong ïa ki shnong ki thaw jong ki kiba lait na ka jingpang TB. U la kyrmen ba ha u snem ban wan, kin nang bun ki shnong kin ïadon bynta lang ha kane ka jingïakhun bad kin shim ïa ki sienjam kiba donkam ban pynduh jait ïa ka jingpang TB.
U ophisar jong ka District Tuberculosis u Dr Chibenthung Kithan u la ban jur ïa ka jingdonkam ban leh kyrkieh ban pynstet ïa ki jingtreikam.
U la ong ba ka jingpang TB ka dang long haduh mynta ka jingpang ba saphriang kaba pynïap briew bun bad kaba lah ban pynkoit pura da kaba shimkhia ha ka por kaba biang.
U la kyntu ïa ki paidbah ban ïasnohktilang bad ban ïatreilang ban pynduh jait ïa kane ka jingpang.
Haba kren ha kane ka prokram, u DC ka Dimapur u Tinojungshi Chang u la pynskhem biang ïa ka jingangnud jong ka sorkar ban pynduhjait ïa ka jingpang TB.
