Washington, Lber:
Katkum ki khubor, la iathuh ba uwei u khynnah u la khlad noh shisyndon tang hadien ba u la shah pynbor ha uwei pat u briew ban thiah hapoh ka top sum ba la pyndap da u thah kum ka jingpynshitom ia u.
Ia utei u khynnah la ju ithuh kum u Jadako Taylor bad u la khlad noh ha ka Sngi Saitjaiñ jong ka taïew ba la dep.
La ong ba dei u Anthony McCants, 23 snem, uba la pynbor ia u ban leh ia ki jinglehkai kilan met kum ka ‘push-up’ bad kiwei de ki jingkilan met hapoh jong katei ka top ba la pyndap da u thah. Dei tang hadien ba u la dep ban leh kumta hi, utei u khynnah u la kem pang kynsan namar ka jingsangeh tied u klongsnam bad u la khlad noh shisyndon tang hadien kumba katto-katne por.
Ka Akron Municipal Court ka la pyntip ba ia u McCants pat, la pynngat hapoh ki kyndon pynkheiñ aiñ ba iadei bad ka jingiap jong utei u khynnah 12 snem.
Katkum ka jingpynbna na ka tnat pulit katei ka thaiñ, la ong ba u McCants u hap ban bah-khlieh halor ka jingshngaiñ bad ka jinglong-jingman jong u Jadako namar dei ma u, uba phah ia utei u khynnah ban kilan met ha utei u thah haduh arsien tang hapoh jong ka 1 kynta. Hadien ba u la leh ia kaba la bthah baroh, utei u khynnah la ong ba u la prie bad u la sangeh ring mynsiem shipor ha shwa ban phone sha ki tnat sumar ban ioh leit iarap ban pynim ia u.
Namar la iathuh ba wat ka jingdait-thah ha ka met jong u ka la don tang 74 Degree, kaba pyni ia ka jinghiar kaba haduh 20 Degree na kaba ju dei ban long ha ka met jong u briew.
Kumta, la ong ba haba ka met jong u briew ka la hiar sha katei ka degree, ki dkhotmet kiba don shapoh ki lah ban duh lane ban sangeh treikam noh shisyndon bad kane ka lah ban wanrah ia ka jingiap ba kyndit lada ym lah ban sumar noh tang mar ia iohi ia ki dak jong ka jingshitom.
