Shillong, Lber 30
U nongkiew lum ka Jylla u Teimiki Sungoh na Shangpung, West Jaiñtia Hills u la ïohpdiang ïa ka nam kum ‘Best Rescuer’ hadien ba u la lah ban pynpaw ïa la ka jinglah ha ka prokram shah hikai ba la tip kum ka ‘Search and Rescue Course’ ha ka Himalayan Mountaineering Institute (HMI).
Utei u Asst. Secretary jong ka Meghalaya Sport Climbing and Mountai-neering Association (MeS CMA) u la ïohpdiang ïa katei ka kyrdan ryngkat 11 ngut ki nongshah hikai napdeng 26 ngut. Te kumta u la ïohpdiang ruh da ka Grade ‘A’ kaba long kaba heh duh ba la ai da ka Mountaineering Institutes na ka bynta ki nongshim bynta kiba la lah ban pynpaw ïa ka jingtbit ha ka prokram shah hikai.
Ïa kane ka prokram ai jinghikai la sdang naduh 6 tarik bad ka la kut ha ka 28 tarik mynta u bnai. Te kumta halor kane ka jing-leit shim bynta la bei tyngka da ka tnat ïalehkai jong ka Sorkar Jylla.
Tang 23 ngut ki nongïashim bynta na kylleng jong ka ri ki la pyndep ïa kane ka jinghikai bad ki la long kiba lah ban pyllait im bad ban kiew sha manla ki jingeh ban ïarap ïa ki bor pynïaid district bad kiwei kiwei ki kynhun seng. U Teimiki u dei tang ma u na ka thaiñ Shatei Lam Mihngi, uba la lah ban pynpaw ïa ka jingtbit bad u la shah jied ban long u Guest Instructor na ka bynta ki jinghikai ban wan ha u Jymmang mynta u snem.
Ki nongshah hikai ki dei ban long kiba koit ba khiah ha ka met bad ka jingmut jingpyrkhat bad ban don ka jingmut kaba bha bad kaba sngewtynnad ban ïalehkai.
