Imphal, Lber:
Ha ka jingpynshitom kaba tyngeh ïa ka jingkhaïi tuh ïa u drok ha ka thaiñ, ki pulit ka Manipur ki la kem ïa saw ngut ki nongkhaïi tuh, kynthup ïa arngut ki kynthei, bad kurup ïa u Brown sugar ba shongdor kumba 1 klur tyngka katkum ka dor khaïi pateng ha ka pyrthei, hynriew tylli ki Mobile, bad kawei ka kali saw shaka.
Da kaba leh katkum ka jingai jingmut ba kyrpang na ki tyllong khubor ba lah ban shaniah shaphang ka jingïaid jong ki mar ba la khang pyrshah ha ka surok bah National Highway 102 ha Kangpokpi-Senapati-Mao, ka kynhun na ki pulit jong ka distrik Kangpokpi ki la ïai bteng ban peitngor bha.
Ka kynhun ka la bat ïa kawei ka kali saw shaka kaba ïaid na Kangpokpi sha Senapati, kaba kit ïa 6 ngut ki briew, kynthup ïa arngut ki kynthei. Haba la khmih bniah ïa katei ka kali, ki pulit ki la ïoh ban kurup ïa 174 tylli ki synduk sabon kiba don ïa u Brown Sugar uba shong dor kumba 1 klur tyngka ha ka ïew pyrthei bad 6 tylli ki Mobile Phone.
Hadien kane ki pulit ki la ithuh ïa kine ki briew kiba la shah kem kum u Khaikahao Kipgen @ John (40), u Letgoumang Touthang ba la tip ruh da ka kyrteng kum u Amon (33), u Aabi Baral (28), u Jitten Kharka (22), u L H Ranirou (42), bad ka Leah Chao (44). Ki la buh jingmudui halor ka mukotduma katkum ki kyndon aiñ kiba ïadei bad kane ka jingjia.
Ka jingpynbna ba pawnam ka la pynksan ba kane ka jingtreikam ka pynpaw ïa ka jingangnud jong ki pulit ka distrik ban khanglad ïa ka jingshalan tuh ïa u drok ha ka thaiñ bad ban pynthikna ïa ka jinglong jingman kaba kham shngaiñ na ka bynta ki nongshong shnong ha ka thaiñ.
