D H Kharkongor
Ym sngewphylla lymne sngewkyndit ïa ka jingbym banse jong ka Voice of the Peoples’ Party (VPP) ban ‘suspend’ syndon ïa i bapli i Bahrit Adelbert, iba dei i MLA jong ka Shillong North Assembly Constituency.Yn dang sngewkyndit ne sngewphylla ruh lei haba i Bahrit i lah tynjuh lah biang ïa ka jingïaishah jong ka VPP. Te hato dang donkam sieh mo ban ïa ñiewtang ïa kita ki ‘anti party activities’ lane ki jingkren ki jingkynthoh lem bad ki jingleh ki jingkam ki jong i, kiba long pyrshah ïa ka riti treikam jong ka VPP? Nga ngeit kiba bun ki ïa tip shai ïa ka jinglong tynrai lane ïa ka jingmlien ka jong i Bahrit Adelbert, kaba ju ïaibuh jingeh wat ïa ka VPP hi baroh kawei. Kiba bun ki tip bad ki sngewthuh bha ruh ïa ka jingïadei ka jong i Bahrit Adelbert, mynno-mynno, bad ka KHNAM. Lah ban ong ba ynda kumne mynta wat ka VPP ruh ka mad ïa kaei kaba ka KHNAM ka la dep ban mad.
Ha kaba ïadei bad ka jingjubab pynshai ka jong i Bahrit Adelbert, lem bad kita ki saw ngut ki paralok ki jong i, ïa kita ki jingkren bad ki jingleh ki jong i, kiba long pyrshah ïa ka VPP, ka VPP hadien kaba ka la pule bniah bad puson sani bha ka sngewthuh shai ba i Bahrit Adelbert im kubur ïa la ka jong ka jingduna lane jingbakla hynrei i pynksan jubor pynban ïalade. Ka rukom jubab kaba pynpaw pynban kumba im suitñiew hi ruh haduh katno ka jingleh ka jong i, lem bad ka kynhuh ka jong i, ka ktah jur ia ka VPP hi baroh kawei. Ka rukom jubab kaba pynpawshai ba im burom ruh de ïa ka ‘Saiñpyrkhat’ bad ïa ki ‘Nongrim’ ki jong ka VPP. Ka jubab kaba kumba kob pynban.
Kum ban shu ong noh ka VPP kam hun ïa ka rukom jubab ka jong i Bahrit Adelbert. Kam shym khmih lynti hi ruh ïa kaba kum kata ka rukom jubab. Ngam artatien ba ka VPP ka khmih lynti pynban ïa ka jingsdang jong ka jingïasngewthuh jingmut. Kiba ithuh bha ïa i Bahrit Adelbert, lem bad ïa ka dor kaba shisha ka jong i, kin nym sngewphylla ïa kata ka rukom jubab. Ym artatien ba kim phylla balei ba ka VPP kam banse ban ‘suspend’ ïa i lem bad ïa kita ki saw ngut ki paralok ki jong i. Lehse kin poi ban ïa rymmuiñ pynban.
I bapli i Bahrit Adelbert i lah hap hapoh ka ‘suspension’ kaba haduh 3 (lai) snem kynthih. Kumta haduh 3 (lai) snem kynthih i bapli i Bahrit Adelbert in nym lah ban bat ïa kano kano ruh ka kyrdan treikam hapoh ka VPP. Yn nym bynshet ruh ha i ïa kano kano ruh ka kamram lem bad ka jingkitkhlieh. Kumta in nym lah ban kam ba i dei i dkhot jong ka VPP kaba katno tam ban ïeng mih khmat ïa ka VPP ha kano kano ruh ka rynsan paidbah. Ym tang kumta la khmih lynti ruh de ba i Bahrit Adelbert in nym kynthoh ne leh ïa kano kano ruh ka ban buh jingeh ïa ka VPP, kaba katno tam ban pynthohbria ne pynsniew ïa ka VPP.
Ym sngewdei khlem da pynkynmaw ba i Bahrit Adelbert i poi pynïasnoh ïalade bad ka VPP dang shen, kata, tang katto katne taiew shwa jong ka MLA Election 2023. Ha shwa ïa kata im ïadon bynta bad kano kano ruh ka seng saiñ hima-sima, kata, hadien kaba im lah ban ia sngewthuh jingmut bad ka KHNAM. Kum ban shu ong noh ha ka saiñ pyrthei i bapli i Bahrit Adelbert i la shu poi ïaid marwei marwei, khlem paralok parajor. Lah ruh ban ong ba kato ka jingjop donburom ka jong i ha u 2023, ka dei na ka daw jong ka VPP. Ka dei ka jingngeit, ka jingshaniah bad ka jingkyrmen ka jong u paidbah ïa ka VPP, kaba pynjop donburom ïa i, ym da kumwei pat.
Ym lah ruh khlem da pynkynmaw ba i Bahrit Adelbert i dei iba mlien ban ïaid marwei, katta, kat kum ka bor sngewthuh kaba i don. Ka jingleh kiba katkum ka jingïalam jong ki ‘jingsngew’ (emotions) ki jong i. Ka jingsngewthuh pat de ruh kaba kat kum ka jingtip (knowledge) kaba i lah ban don ei, kaba kat kum ka pule puthi ka jong i. Lah namar kata ban ong ba ha ka liang jong ka jingtip, ka jingshemphang bad ka jinglah ban ïohi jngai i bapli i Bahrit Adelbert im don ha kajuh ka kyrdan bad kita kiwei pat de ki proh jabieng bad ki khraw pyrkhat jong ka VPP. Lah ban ong ba i bapli i Bahrit Adelbert im don ha ka juh ka ‘mental wavelength’ bad ki ‘Think-tanks’ jong ka VPP. Im don pat ruh ïa ka jingsngewrit kaba shisha kaba kat ban kubur ba kita kiwei ki kham tip kham bha ban ïa i, kaba katno tam ban long uba kloi ban shah hikai ha ki. Kane lah ban ong ka dei kawei na ki daw bah ba balei ba im lah ban ïa sngewthuh jingmut bad ki.
I bapli i Bahrit Adelbert i lah hap hapoh ka ‘suspension’ kaba haduh 3 (lai) snem kynthih, kata, tad haduh shwa ban kut noh u Lber 2028. Kumta i bapli i Bahrit Adelbert in nym lah ban bat ïa kano kano ruh ka kyrdan treikam hapoh ka VPP tad haduh shwa ban kut noh u Lber 2028. Yn nym bynshet ruh ha i ïa kano kano ruh ka kamram lem bad ka jingkitkhlieh. Kumta in nym lah ban kam ba i dei i dkhot jong ka VPP kaba katno tam ban ïeng mihkhmat ïa ka VPP ha kano kano ruh ka rynsan paidbah. Lah namar kata ban ong ba i Bahrit Adelbert i la duh ïa ka kubu ban mih khmat kum u kyrtong jong ka VPP ha ka MLA Election 2028. Ym artatien ba ka VPP ka lah don jingmut da uwei pat u kyrtong. U kyrtong uba kynsai naduh ka jinglong kaba beit tad haduh ka jinglong kaba lah ban shaniah. U kyrtong uba la biang naduh ka jingtip, ka jingshemphang, ka jingïohi jngai tad haduh ka jing-tbit kum u nongsaiñ hima-sima bad ym eh tang ka jingsngew ‘Ieit Ri bad Ieit Jaitbynriew’ ne uba don tang kata ka ‘Mynsiem kaba Ieit Ri – Ieit Jaitbynriew’.
