Shillong, Ïaïong 01
Ka Meghalaya Sport Climbing and Mountaineering Association (MeSCMA) ka la wan shakhmat ban pynbna ba u Bah Keliostar Pdai uba long u pulit Constable jong ka 3rd MLP Battalion u la shah jied ban leit shah hikai ha ka Basic Mountaineering Course (BMC), katba u Balawanhabor Rynjah uba dei u samla pule jong ka Sankardev College ban leit shah hikai ha ka Advance Mountaineering Course (AMC) ha ka Himalayan Mountaineering Institute (HMI), Darjeeling naduh ka 1 tarik haduh 28 tarik u Ïaïong mynta u snem.
Ïa kane ka jingleit shah hikai la bei tyngka da ka tnad ïalehkai jong ka Sorkar Jylla.
Kat kum kum ki kyndon la ong ba ka BMC ka dei ka nongrim ai jinghikai ha kaba yn pynrung ïa ki nongshah hikai ha ka pyrthei jong ka jingpynkylla jong ka suiñbneng ha ki jaka ba long kynjang na sla duriaw, ki jaka ba don ki mawsiang bad ki jaka ba rben u thah bad kiwei.
Katba ka AMC ka ju neh haduh 28 sngi bad la shna na ka bynta ki briew kiba la pyndep ïa ka BMC ha ka Grade “A”. Ka AMC ka thmu ban hikai ïa ki nongshah hikai ban long ki nongïalam bad ki dkhot kiba lah ban long ki nongïalam sha ki lum Himalaya bad ban pynmih ïa ki nongkiew lum ba hakhmat duh’.
