Agartala, ïaïong:
Ki la don baroh 1,797 ngut ki briew, kynthup ïa ki 1,626 ngut ki shynrang bad 171 ngut ki kynthei, kiba la shah kem ha ki ar snem naduh u bnai Lber 2023, namar ka jingkynnoh ba ki donkti ha ka jingkhaïi tuh ïa ki mar ba la ñiew beaiñ bad ban thung ïa u Ganja, ong ka kaiphot ba la wanrah dang shen da ka tnad ki kam pohïing ka jylla ha ka ïing dorbar thawaiñ.
Napdeng kiba la shah kem, ki don 10 ngut kiba la shah rai pynrem ha ki ïingbishar bapher bapher jong ka Jylla.
Naduh u bnai Lber 2023 haduh u bnai Rymphang, 2025, la mudui haduh 994 tylli ki mukotduma hapoh ka Narcotic Drugs and Psychotropic Substances (NDPS) ha ki jaka treiakm jong ki pulit ha ki jaka bapher bapher ha Tripura, la ong ka kaiphot. Ha kine ki lai snem ba la dep haduh u bnai Rymphang, ki pulit ki la ai 1,445 tylli ki mukotduma kiba ïadei bad ka NDPS.
Na ka bynta ki briew kiba donkti ha ka rep ïa u jingdih pynbuaid, pyndonkam bad khaïi tuh ïa ki mar ba la ñiew beaiñ, ka jingpynshitom ka long haduh shi snem ka jingshah set phatok kaba tyngeh, kaba lah ban pynjlan haduh 20 snem. Nalor kata, la pynngat ruh ïa ka kuna kaba T.1-2 lak.
Ka sorkar jylla ka la kurup ïa ki mar bapher bapher kiba la khang pyrshah ha ki lai snem (2022-2024), ba kynthup ïa 1.54 lak kg u drok, 4.82 lak ki bilor dawai jyrhoh, 25. 01 lak tylli ki dawai Yaba bad pynjot ïa ki Ganja ba la rep ha ka jaka kaba heh 5,853.94 hectare.
Ka Tripura ka don 856 km u pud u sam bad ka ri Bangladesh, kynthup ïa u pud u sam uba don ha ka khyndew bad ha ki wah, kaba bun na ki la tap da ki nar lyngkhot lyngkhai lait noh tang katto katne ki jaka kiba dang sahkut namar ki jingïakajia ha ka thaiñ.
Ka jingkhaïi briew, ka jingkhaïi tiar ïaleh, ka jingkhaïi drok, ka jingkhaïi masi bad kiwei kiwei ki jingri ki dei napdeng ki kam runar kiba kongsan kiba ïaid sha shiliang u pud u sam.
Kham hashwa ha u snem 2023, u Myntri Rangbah u Manik Saha u la ong ba ki nongkhaïi drok ki pyndonkam ïa ka Tripura kum ka lynti syngkien jong ki na ka bynta ban khaïi tuh namar kane ka jylla ka dei kaba la ker sawdong da ka khappud Bangladesh.
