Shillong, Ïaïong 02
Ka Nottingham Forest ka la ïoh ïa ka jingjop kaba kongsan hadien ba ka la pynliem noh ïa ka Manchester United da 1-0 kol ha City Ground kaba la long ha ka sngi Balang kaba la nang pynskhem shuh shuh ïa ka jingkyrmen jong ka ban ïoh shim bynta ha ka Champions League, katba ka Arsenal ka la ïai bteng ban buh jingma ïa ka Liverpool lyngba ka jingjop ïa ka Fulham da 2-1 kol.
U rangïalehkai barim ka Manchester United u Anthony Elanga u la lah ban pynkhih jar na ka bynta ka Forest ha ka minit kaba 5 ha kaba u rangapkol ka United u Andre Onana um shym la lah ban pyllait na ka jingshah thep.
Ka Forest kaba don mynta ha ka kyrdan kaba lai, ka la tam haduh 10 poiñ ïa ka Newcastle kaba don ha ka kyrdan kaba hynriew, ha kaba san tylli ki kynhun kiba wan kham shakhmat ki lah ban ïoh rung sha ka Champions League namar ka jingïalehkai kaba khlaiñ bha jong ki klob jong ka ri England ha kane ka samoi ïalehkai.
Ka Forest, kaba dei ka kynhun kaba la jop arsien ha ka dewbah Europe, kam pat shym la ïoh shim bynta ha ka Champions League naduh u snem 1980 hadien ba ka la bat ïa ka nam lahduh.
U Elanga uba la mih noh na ka United ha u snem 2023, u la shem ïa ka jingjop hapoh ka jingïalam jong u Nuno Espirito Santo ha ka Forest.
“U dei u khynnah uba kyrpang bad u ai ïa kane ka kynhun ïa ka jingsted jong u. U la lah ban pynurlong dalade bad ngi sngewkmen,” la ong u Nuno shaphang ka jinglehkai jong u Elanga.
Ka samoi ïalehkai ba itynnad jong ka Forest ka dang ïai bteng wat la ka la ïalehkai 120 minit ryngkat bad ki penalty pyrshah ïa ka Brighton ha ka quarter-final jong ka FA Cup myn ha ka sngi Saitjaiñ bad ka la duh noh ïa u rangthep kol ba kynsai u Chris Wood namar ka jingmynsaw.
Na ka liang u manager ka United, Ruben Amorim, u la pynpaw ïa ka jingsngewsih halor ka jingïalehkai jong ka kynhun jong u: “Ha kane ka samoi ïalehkai kaba mynta ka long kaba eh bha ïa ka kynhun. Ngi la ïoh bun tylli ki kabu ban thep kol hynrei ngim shym la lah ban pynurlong. Ngi la dei ban jop ha kane ka jingïalehkai, wat ban ïakhaid, hynrei ha kaba kut ngi la shah rem bad duh noh ïa ki lai poiñ.”
Ka United kaba dang sah ha ka kyrdan kaba khatlai ka la buh jingeh ïalade ban ïoh jingjop lynter ha ka Premier League mynta ka samoi.
Ha kawei pat ka jingïalehkai, ka Arsenal ka la lah ban pynurlong ïa ka jingjop lyngba u Mikel Merino bad u Bukayo Saka, kaba long ka kol kaba nyngkong hadien ba wanphai na ka jingmynsaw.
“Ka por kaba itynnad ban ïohi haduh katno ki briew jong ngi ki ïeit bad burom ïa u Bukayo,” la pynpaw u Manager ka Arsenal, u Mikel Arteta ha kaba ïadei bad ka jingpdiang sngewbha kaba u Saka u la ïoh.
Ka jingjop jong ka Arsenal ka la shah tap lup hadien ka jingmih noh u rangïalehkai shadien Gabriel Magalhaes na madan namar ka daw ka jingmynsaw, kaba la pynjur shuh shuh ïa ka jingkhuslai jong ki halor ka jingmynsaw ha shwa ka jingïalehkai Quarter Final jong ka Champions League pyrshah ïa ka Real Madrid.
U Saka u la lah ban ïalehkai bha hadien ba la bujli ïa u Ethan Nwaneri, ha kaba u la thep ïa ka kol kaba shiphew ha kane ka samoi ïalehkai hadien ka jingïarap pynbuh bol da u Merino. Hynrei shwa ban wai u Rodrigo Muniz u la pynphai kylla shi kol na ka bynta ka Fulham shwa ba kan shah rem.
Ka thup jong kiba mynsaw ha ka Arsenal ka dang ïai kiew ha kaba u Jurrien Timber ruh u la mih noh na kane ka jingïalehkai na ka bynta ban ïasoh lang bad ki rangïalehkai kiba la mynsaw lypa kum u Riccardo Calafiori, Ben White, Kai Havertz, bad u Gabriel Jesus.
Kane ka jingjop ka la pynduna ïa ka jingïapher jong ka Arsenal bad ka Liverpool kaba wan hakhmat eh ha ka league kaba la tam da 9 poiñ.
Ha kiwei pat ki jingïalehkai ha ka Premier League, ka Wolves ka la kyntiew ïa ka jingkyrmen hadien ka jingjop ïa ka West Ham da 1-0 kol ha Molineux, ha kaba u Jorgen Strand Larsen u la thep marwei ïa ka kol kaba la pynlong ïa ka ban kham jngai da 12 poiñ na u lain jong ka jingshah pynhiar kyrdan.
