Shillong, Ïaïong 04
Ka Directorate of School Education & Literacy ha ka 4 tarik u Ïaïong, 2025 ka la pynkut noh ïa ka Rajya Stariya Bal Vaigyanik Pradarshani 2024-2025 (State Level Science, Mathematics and Environment Exhibition for Children) halor ka phangpdeng “Science and Technology for Sustainable Future” kaba la sdang ha ka 3 tarik u Lber 2025.
Ïa kane ka jingpyninam la pynlong hapoh ka State Headquarter Bharat Scouts and Guides, Pine Mount Ridge, Laban, Shillong.
Shwa kane, ka la don ka Interaction session haba ïadei bad ka jingpyni ïa ki jingshna ba la pynwandur hi da ki khynnah skul ïa kaba la ïashim bynta da ki khynnah skul bad ki nonghikai na ki skul bapher-bapher.
Ha katei ka sngi, u Bah Banteilang J. Kharshandi, MCS, Directorate of School Education & Literacy, Meghalaya, u la long kum u kongsan katba ka Kong I. Sohtun, Joint Director of School Education & Literacy East Khasi Hills District, Shillong ka la kum ka shongknor ban pynïaid ïa katei ka prokram.
Haba ai jingkren ha katei ka sngi, na ka liang u kongsan, Bah Banteilang J. Kharshandi, MCS, Directorate of School Education & Literacy, u la pynpaw ïa ka jingkmen kaba khraw ban long kum u kongsan ha katei ka sngi namarba u don ha ka Tnat treikam kaba ïadei bad ki khynnah skul kumjuh bad ki nonghikai kaba long kaei-kaei ka kam kaba sngewtynnad bha.
Shuh-shuh, ha katei ka sngi ka la don ruh ka jingsam ïa ki khusnam sha ki khynnah skul kiba long nongjop ha kane ka jingpyninam ïa kaba la pynbna da u Bah S.A War, Directorate of School Education & Literacy ïa kaba la sam da u kongsan, ka shongknor bad kumjuh da ka Kong A. Kharpuri, Deputy Director of School Education & Literacy.
