Moscow, Risaw:
Ki pulit jong ka Russia, ki la kem ïa uwei u khynnah rit ha kaba iadei bad ka jingkynnoh ba u thmu ban thombor ïa ka Moscow, ong ki tnat pathai khubor jong ka Russia, ha ka Sngi U Blei, hadien ba ka Russia, ka la ioh jingtip na ka America.
Ka tnat treikam jong ka US ha Moscow ka la pynmih ïa ka jingpynbna ha ka Sngi Saitjaiñ da kaba ong ba ka la peit thuh ïa ki jingma jong katei ka jingjia ha ka Tsaritsyno Museum Reserve kaba don hapoh ka nongbah Moscow jong ka ri.
Kumjuh ruh na ka liang jong ka tnat Embassy jong ka US kam shym la ai jingtip bniah mano ba thmu ban thombor ha katei ka jingjia.
Ha ka jingpynbna ba la sot da ki tnat pathai khubor jong ka Russia ha ka Sngi U Blei, ka tnat pahara jong ka FSB jong ka Russia ka la ong ba ka la kem ïa uwei u khynnah rit uba la buh ïa ki dur jong u ha ka TikTok ba u phong ïa ka balaclava, ka sopti bad ki khmat khmat bad u bat ïa kaei kaei kaba ïasyriem bad ka tiar siat automatic.
Une u shynrang bym lah ban ithuh, uba ka FSB ka la ong ba u dei u nongshong shnong jong ka Russia, ula sam ïa ki dur ba la shim ha ka jaka buh jingthoh jong ka Tsaritsyno ryngkat bad ka jingthoh: “Nga la lap ïa ka jaka” bad la kynnoh ba u la shim bynta ha kawei ka channel Telegram jong ka “neo-Nazi”, la ong ka khubor.
Ka FSB kam shym la jer kyrteng ïa u shynrang ba la kdew.
“Ngi sngewnguh ïa ka liang jong ka America na ka bynta ki jingtip ba la ai,” la ong ka FSB.
Ka jaka buh jingthoh jong ka Tsaritsyno ka dei ka ïing syiem bad ka jaka jngohkai pyrthei ha ka thaiñ shatei lam mihngi jong ka Moscow kaba ki nongshong shnong bad ki nongjngohkai pyrthei ki pawnam bha.
Ka Russian Telegram Channel Baza kaba la iathuh ba ka don ka jingiadei bad ki bor jong ka ain, ka la ong ba ïa katei ka park la khang ha ka Sngi Saitjaiñ bad plie tang ïa ki briew kiba mih na katei ka jaka.
Ka US ka la ai jingmaham ïa ka Russia halor ki jingthmu thombor shwa, kynthup ha u Lber 2024, katto katne taiew shwa ka jingthombor jong ka ISIS-K ïa kawei ka jaka ïalehkai ha Moscow kaba la pynïap ïa palat 100 ngut ki briew.
Ka jingïadei hapdeng ka Russia bad ka America ka la nang tyrkhong ha kine ki bnai ba ladep, hapdeng ka jingïakynad kaba dang ïai bteng hapdeng ka Washington bad ka Kyiv halor ka jingïateh kular hapdeng ka US bad ka Russia halor ka umphniang Diesel.
