Raipur, ïaïong:
U Myntri ka tnat poh ïing jong ka sorkar pdeng, u Amit Shah, ha ka sngi Saitjaiñ, u la ong ba ki Naxal kin ym lah ban khanglad ïa ka roi ka par jong ki riewlum ha ka thaiñ Bastar jong ka Chhattisgarh bad u la kyntu ïa ki ban buh ïa ki tiar ïaleh katba u dang pynskhem ba ym don mano mano ruh kiba kmen haba ki shah pynïap.
Haba kren ha ka jingïalang pynkut ïa ka tamasa ‘Bastar Pandum’ jong ka sorkar jylla, u Shah u la pynpaw biang ba ka sorkar ka thmu ban pynduhjait ïa ka jingma jong ki Naxal haduh u bnai Lber, 2026, da kaba bynrap ba kito kiba aiti kin long shi bynta jong ka lynti kaba kongsan katba ïa kiwei pat yn shim da ki bor pahara.
“Ki sngi ba la siat kuli bad bthei bom ha Bastar ki la kut noh. Nga kyntu ïa ki para Naxalite ban buh tiar ïaleh bad ban ïasoh bad ka kynhun ba kongsan. Phi dei la ka jong. Ym don ba sngewkmen haba uno uno u Naxal u shah pynïap. Tang shu aiti ïa ki tiar ïaleh jong phi bad ïasoh bad ka kynhun ba kongsan jong phi,” la ong uwei na ki para dkhot.
U Shah u la ong ba ki lehnoh kiba la aiti noh kiba long shi bynta jong ka jingpynroi kin ïoh ïa ka jingïada kaba pura na ka sorkar pdeng bad ka sorkar jylla.
“Kane ka thaiñ ka donkam ïa ka roi ka par. U Myntri Rangbahduh ka ri u Narendra Modi u kwah ban ai lut ïa baroh sha u Bastar ha ki san snem. U Bastar um shym la ïohi ïa ka roi ka par ha ki 50 snem. Hynrei kane ka lah ban jia tang haba ki khynnah ki leit skul, ki tehsil ki don ïa ki jaka ai jingsumar. Uwei pa uwei u don ïa ka Aadhaar Card, ka Ration Card bad ka koit ka khiah,” u la ong.
Ka roi ka par ka lah ban jia tang ynda ki briew ka Bastar ki la rai ba kin pynlong ïa ki ïing ki sem bad ki shnong jong ki kiba lait na ki Naxal, u la ong.
U Myntri Rangbah ka jylla u Vishnu Deo Sai bad u Synbud Myntri Rangbah u Vijay Sharma ki la pynbna ba ïa ki shnong kiba ïarap ban pyndem wait ïa ki Naxal bad pynbna ïalade ba ki long kiba lait na ki Maoist yn ai pisa T.1 klur (ki jingtrei na ka bynta ki jingtei), la kdew u Shah.
“Ki la don baroh 521 ngut ki Naxal kiba la buh tiar ïaleh haduh mynta ha u snem 2025, katba 881 ngut ki la aiti noh ha u snem 2024. Kito ki Naxal kiba la sngewthuh ba ym donkam ïa ki tiar ïaleh, ki IED bad ki bom kawang kti na ka bynta ka roi ka par hynrei ki Computer bad ki khulom la aiti noh,” la ong u Shah.
Haba ïaroh ïa kane ka tamasa ‘Bastar Pandum’, u Shah u la ong ba yn sa pynlong ha ka kyrdan jong ka ri ha u snem ban wan, da kaba bynrap ba un kyrpad ïa u President Droupadi Murmu ban pynitynnad ïa ka jingplie bad ban kyrkhu kyrdoh ïa ki para riewlum.
La pyntikna ba lada ki lehnoh ne ki riewkiengatiat ki kloi ban leit aiti ïalade ha ki kti jong ka aiñ ka roi ka par kan kiew sted ha kiba bun ki liang khamtam ha ki thaiñ ba kham shah ktah jur ha ki lehnoh ha ki por bad ki snem ba la leit. U Myntri u la kyntu jur ba kane ka jingkyrpad jong u kan long kaba seisoh.
