Ramallah, Iaiong:
Uwei u nong Palestine u la iathuh ha ki nongthoh khubor ka Gaza Strip ba ki shipai ka Israel ki la siat iap ia uwei u khynnah hapoh 18 snem, uba dei nongshong shnong ka US hynrei uba im ha ki thaiñ jong ka West Bank. Katba ki shipai Israel pat ki pynksan ba ki siat tang ia uwei u lehnoh uba thombor ia ki kali shipai da ki maw heh.
U Omar Muhammad Saadeh Rabee, 14 snem ka rta u la shah pyniap ha Turmus Ayya, hynrei u don ia ka syrnod trai shnong na US.
Katba ki shipai Israel ki iathuh ba ha ka por ba ki dang ïakhun pyrshah ia ki lehnoh ha Turmus Ayya la don 3 ngut ki lehnoh kiba la lun maw sha ka surok bah, kumta kane ka la buh jingma ia ki riew paidbah kiba niah kali bad kiba ïaid lyngba ia katei ka thaiñ.
Haba iadei bad kane, ka tnat ka koit ka khiah jong ka Palestine, ka iathuh ba uwei u briew u la shitom jur bad uwei pat, u la shu mynsaw malu- mala ha katei kajuh ka jingjia.
U Shalabi, u iathuh ba uwei na kitei kiba mynsaw, u don ruh ia ka syrnod long trai shnong jong ka US. Ka Turmus Ayya, kaba don sha ka phang Shathie jong ka nongbah ba kongsan jong ka West Bank, ka Ramallah, ka dei kaba la tip ba ka don shibun ki nongshong shnong jong ka US bad ka Palestine.
Ka Palestine Red Crescent, ka iathuh ba ki kynhun jongka, ki la pynkit noh ia utei u khynnah sha ka jaka sumar. Ka la iathuh ruh ia ka jingmynsaw jong ki arngut ki khynnah shynrang kiba la shah siat kuli na ki bynta jong ka kpoh bad ka tyrpeng, ha ka por ka jingiakhun jong kitei ki shipai Israel bad ki lehnoh.
Uwei na kitei ki arngut, uba dei u Abdul Rahman Shehadeh, uba dang 14 snem ka rta, uba la shah siat ha uwei u shipai katba u dang lum ia ki soh hajan katei ka shnong.
Uba ar, uba la shah siat na ki bynta jong ka kpoh, u dei u Ayoub Asaad, uba dang 14 snem ka rta. U kpa jong utei u khynnah u la pynthikna ba une u khynnah u don ia ka passport jong ka US.
Kumta ruh na ka liang ka tnat kam bar ri jong ka Palestine, ka la pynrem ia ka jingpyndonkam bakla jong ki shipai Israel ia ka suloi ban thombor pyrshah ia kitei ki 3 ngut ki khynnah ki bym don daw ne dak sniew eiei.
