Bali, Risaw:
Da ki spah ngut ki paidbah nongshong shnong Bali jong ka ri Indonesia, ki la mih paidbah ban iakhih pyrshah ïa ka sorkar ha ka Sngi Palei namar ka jingkyrduh umphniang ha katei ka nongbah bad na ka liang ki bor pyniaid ki la kynnoh ïa ki kynrum- kynram kiba pynthud ïa ka jingpynpoi umphniang sha katei ka dew lynnong Bali.
Ki heh sorkar ki la kyntu ïa ki nongshong shnong ban shong sngap jar ha kane ka taiew, da kaba kdew ba ka don ka umphniang kaba biang ban leit kylleng- kylleng ha ka ïew kaba shaniah ha ka umphniang petrol bad diesel ba la phah shapoh.
La ong ba ki laiñ ap petrol jong ki thuk-thuk bad ki kali ha katei ka nongbah, ki la poi haduh palat shi kilomitar ka jingjrong ha ki katto- katne ki jaka theh umphniang ha ka nongbah jong ka jylla Denpasar ha ka Sngi Palei, ong u nongthoh khubor jong ka AFP, bad kumba 500 ngut ki briew ki la ïalum paidbah shabar jong ka ophis jong u Lat ka Jylla ban pyrshah jur halor kane.
Ka jingthut ka jingpynpoi umphniang ka dei namar ka jingpynslem ban sam marbam hadien ba kawei ka jhad kit marbam ka la shem jingeh ban pynhap ïa ki marbam jongka, ong ka khubor jong ka kompeni umphniang bad gas jong ka sorkar Pertamina.
Ka trok kit umphniang kaba kit palat 22 million litar ka umphniang ka la poi ha Bali ha ka Sngi Ba-ar, ha kaba la khmih lynti ba ki jingpynpoi kin lah ban pyndap ïa ka jingdawa ha katei ka dew lynnong haduh ki hynriew sngi ban wan, la ong u Lat I Wayan Koster ha ka sngi Balang.
Hynrei uwei pat u nongïakhih uba la tip kyrteng kum u Ibram Syahbani u la ong ba u sngewsih ba ka sorkar kam shym la lah ban pynbeit ïa kane ka jingeh hapoh ar sngi kumba la kular.
U Wayan u la bthah ïa ki nongtrei sorkar ba kin trei na la iing na ka bynta lai sngi lynter kaba sdang ha ka Sngi Palei, katba ki skul bad ki skul bah kin kylla sha ka jingpule online ha katei ka juh ka por.
Ka Indonesia ka la dep ban ïakhun pyrshah ïa ka jingduna umphniang mynta u snem naduh ba la sdang ka thma Iran kaba la pynthut ïa ka jingpynbiang bor ding ha ka pyrthei.
Ka Jakarta ka la wanrah ïa ka polisi kaba khanglad ïa ka jingthied umphniang ha u Lber bad la bthah ïa ki nongtrei sorkar ba kin trei na iing man la ka sngi Palei, shi bynta na ka jingpyrshang jong ka sorkar ban pynduna ïa ka bor ding.
