Kane ka long ka jingkylli kaba eh ban batai lymba ngim pyrkhat sani ïa ka rukom hiar pateng jong ka kur ka jait, Em, kam don ka jingïadei kaba jan para kur para jait. Ka daw lehse ngi lah ban shem hapdeng shi kur shi jait, ka long kumne ha ka jingiohi jong-nga, la ka dei ka kur ka jait jongngo jongno ruh lehse kam don ka jingïapher kum ka jait ka kur jongnga. Ngi shu ïadei shi kur ka juh ka jait pateng la pateng hynrei ngim da don eh kata ka jingsngew ïajan kumba long hapdeng shi kpa shi khun na ujuh u symbai. Ka daw ka long ba shi jait makna ha ka liang ka shongkha shongman ka don jingïapher jngai na kawei ka briew na kawei pat.
Shubuh ka longïing longsem kaba don sawngut ki khun kynthei. Kine ki khun ki ioh lok lane tnga kawei da ka jait ‘B’ kawei da ka jait ‘D’ kawei da ka jait ‘K’ bad kawei da ka jait bym dei para doh para snam. Te ki khun jong kine baroh sawngut ki ïapher ha u symbai ba ki ioh na ki tnga ba ïapher ka jait.
Kumta ki khun kine ki saw ngut kim don jingïadei na kajuh ka kur. Watla baroh kine ki khun ki ai jait jong ka kmie kaba kha ïa ki.
Te haba ngi bet ïa u symbai ba ïapher kumta ka jinglong jong ki ruh ka ïapher bad kim ïahap bad ka kur ka kmie. Namar u symbai u dei ka tynrai u soh jong kine ki khun na baroh saw ngut ki khun ba hiar pateng na ka meiieit. (Meiieit ka dei ka kmie jong kine ki khun kynthei saw ngut).
Dei halor kane ka nongrim ba watla ïa dei kajuh ka kur ka jait hynrei ka jingïadei ha ka doh ka snam ka ïapher, namar ba ïapher u symbai na ki jait jong ki kpa ba ïapher.
Kumta kam don ka jingïadei kaba jan watla ki ïadei na kajuh ka kur ne ka jait makna. Hooid ha ngi ki khun Khasi khara ngi shim ïa ka jait ka kmie hynrei na ka liang u symbai ka ïapher bad ïa jngai bah kum bym dei shikur. Ngi la shong ïasah ha kajuh ka Jylla, watla ngi don la ka jong ka kur ka jait makna. Shikur ka don ka jingbym ïa dei jan watla ngi shim ïa kajuh ka jait.
C. B. Iawphniaw
