Shillong, Ïaïong 10
Ïa ka prokram ïalehkai jong ka Kalinga Super Cup 2025 la pynbna ha ka Lah Sngi U Blei ha kaba ïa kane ka lympung yn pynlong ha Bhubaneswar, Odisha naduh 20 tarik mynta u bnai haduh 3 tarik u Jymmang.
Ha kane ka lympung yn ïashim bynta da 16 tylli ki klob (13 tylli na ka Indian Super League bad 3 tylli na ka I-League) bad ïa baroh ki jingïalehkai yn pynlong ha Kalinga Stadium.
Kitei ki kynhun jong ka ISL kiba la shah jied ban rung sha ka pre-quarter final ka long katkum ka kyrdan ba khatduh jong ki ha ka league jong ka samoi ïalehkai 2024-25. Ki don lai tylli ki kynhun kiba ïakhun ïa ka I-League kiba la pynthikna ba kin ïashim bynta. Kine ki long ka Churchill Brothers na Goa, ka Inter Kashi, bad ka Gokulam Kerala FC. Te kumta kine ki ka kynhun kan ïakhun pyrshah ïa ki lai tylli ki kynhun ïalehkai ba ha khlieh duh jong ka ISL (Mohun Bagan Super Giant, FC Goa bad Bengaluru FC). Ïa kine ki lai tylli ki jingïalehkai yn rai lyngba ka jingpynïakap ka ban long ha ka sngi Balang.
Ka pre-quarter final kan long ha ka 20, 21, 23 bad 24 tarik mynta u bnai, ka quarter-final kan long ha ka 26 bad 27 tarik, ka semi-final ha ka 30 tarik mynta u bnai, bad ka phainal ha ka 3 tarik u Jymmang. Lada ki kol ki ïaryngkat ha kaba kut jong ka 90 minit ha ka phainal, kan don ka por ba la pynjlan, bud sa ka jingïashut tie-breaker ban rai ïa ka kynhun nongjop.
Ki kynhun kiba jop ha ka Kalinga Super Cup 2025 kin ïoh rung sha ka 2025-26 AFC Champions League Two Preliminary Round. Ka East Bengal FC kaba dei ka lahduh ha ka aïom ba la lah hadien ba ka la pynliem ïa ka Odisha FC ha ka phainal jong u snem 2024 ha Bhubaneswar. Ka Odisha FC (2023), FC Goa (2019) bad ka Bengaluru FC (2018) ki dei ki kynhun ba la dep ban jop ïa ka Super Cup.
Ha katei ka jingïakhun pre-quarter final ka ban long ha ka 20 tarik kan long hapdeng ka Kerala Blasters FC pyrshah ïa ka East Bengal FC bad ka Mohun Bagan SG ïa Churchill Brothers, kaba long ka lahduh ha ka I-League.
