Ahmedabad, ïaïong:
Ka kynhun Anti-Terrorist Squad jong ka Gujarat bad ka Coast Guard ki la kurup 300 kilo drok uba shongdor T.1,800 klur ïa uba la bret sha duriaw Arabian da ki nongkhaïi beaiñ shwa ban phet krad sha shiliang u pud u sam jong ki ri ka pyrthei, la ïathuh ki heh sorkar ha ka Lah Sngi U Blei. Ka kynhun ATS bad ki shipai pahara rud duriaw ki la pynlong ïa kane ka jingkhynra lang hajan u International Maritime Boundary Line (IMBL) ha ka rudnong duriaw Arabian ha Gujarat ha ka miet hapdeng ka 12 bad 13 tarik u Ïaïong, la ïathuh ka khubor ba la pyllait sha ki nonglum khubor.
Mar ïa ïohi ïa ka lieng Coast Guard kaba wan shajan, ki nongkhaïi tuh kiba don ha ka lieng ki la bret ïa ki song jong u drok sha duriaw bad ki la phet krad sha shiliang ka IMBL, la ong ka khubor.
“Ha ka jingkhynra kaba la long baroh shi miet ha ka 12-13 tarik, Ïaïong, ki shipai Indian Coast Guard ki la pynlong ïa ka jingkhynra pyrshah ïa u drok ha duriaw ryngkat bad ka Gujarat ATS. Palat 300 kilo u drok uba shong dor kumba T. 1,800 klur la ïoh kurup.”
U drok ba la ïoh kurup la suba ba u dei u drok Methamphetamine,” la ong ka jingpyllait khubor. “Ïa ki drok ba la ïoh kurup la wanrah sha Porbandar da ka lieng jong ka ICG na ka bynta ban pynlong ïa ka jingtohkit kaba bniah,” la ong shuh shuh ka jingpynlait khubor.
