New Delhi, ïaïong:
U Myntri Rangbahduh ka ri u Narendra Modi ha kine ki khyndiat sngi ba la leit u la ong ba shwa u snem 2014, ka India ka don tang 74 tylli ki kad liengsuiñ, hynrei naduh ki phew snem ba la dep, ka jingdon ka la palat ïa ka 150 tylli kaba pynpaw ïa ka jingkiew kaba khraw ha kaba pynsuk ïa ka jingïadei haba ïanujor bad ki jingpyrshang ba la leh da ka sorkar barim.
U Modi u la rakhe ïa ka Ambedkar Jayanti da kaba buh ïa u maw nongrim jingtei thymmai jong ka Terminal ha ka kad liengsuiñ Maharaja Agrasen ha Hisar, Haryana, bad pynher lama ïa ka liengsuiñ ba nyngkong sha Ayodhya.
Ka jingplie ïa ki liengsuiñ ba la buh por na Hisar — ar sien shi taïew sha Ayodhya bad lai sien shi taïew sha Jammu, Ahmedabad, Jaipur, bad Chandigarh — ka pyni ïa ka jingkyntiew kaba khraw ïa ka Network liengsuiñ jong ka Haryana.
Ka projek thymmai jong ka jaka sangeh liengsuiñ, kaba la shongdor palat T.410 klur, kan don ïa ka jaka buh nongleit nongwan kaba mynta, ka jaka kit mar ba kyrpang, bad ka ïing ban pynïaid ïa ka jingïaid lynti jong ki liengsuiñ.
Haba ai jingkren ha ka jingïalang kaba heh, u Modi u la ai burom ïa u Baba Saheb Dr Bhim Rao Ambedkar ha ka sngi kha jong u, ha kaba u la khot ïa kane ka “Diwali” na ka bynta ki Dalit, ki jaitbynriew kiba shah kyntait bad kiba sahdien.
“Ki shipai jong phi, ki nongïalehkai, bad ka jinglong shi hynmen-para ki dei ka jingithuh ïa ka Haryana,” u la ong, da kaba ai khublei ïa ki paidbah kiba la ïashim bynta da ka jingsngewtynnad.
Haba pyrkhat halor ka jingïaid lynti jong u ha ka saiñ hima sima kham mynshuwa ha kane ka jylla, u Modi u la ong, “Baroh ki briew kiba la ïatreilang bad nga, ka jingtrei shitom jong ki ka la ai bor ïa ka nongrim jong ka BJP ha Haryana. Mynta ka sngi, nga sngew sarong ba ka Haryana ka trei da ka jingsngewkhia ban pyndep ïa ka jingkut jingmut jong ka Viksit Bharat.”
Haba pynskhem biang ïa ka jingangnud jong ka BJP ban kyntiew ïa baroh, u Modi u la bynrap, “Ka sur jong ka BJP ka long ban trei na ka bynta ka jingkiew kaba stet jong baroh ki Dalit, kiba duk, kiba shah iehnoh beiñ, bad ki jaitbynriew kiba sahdien ha Haryana.
Da kaba ong ba ïa u maw nongrim jong ka kad liengsuiñ kum ka dak jong ki jingangnud jong ka Haryana, u la ai khublei ïa ki paidbah bad u la ong, “Nga la kular ïa phi ba ki briew kiba phong slipper ruh kin leit liengsuiñ. Bad ngi ïohi ba kane ka jingkular ka la urlong ha kylleng ka ri.”
U la pynpaw ïa ka jingjop jong ka skhim UDAN jong ka sorkar kmie, kaba la pynlah ïa ki hajar ngut ki nong India ban her liengsuiñ ha ka sien kaba nyngkong.
“Shwa u snem 2014, ka ri ka don tang 74 tylli ki kad liengsuiñ. Mynta ka jingdon ka la palat ïa ka 150 tylli,” ong u Modi, da kaba pynpaw ïa ka jingktah jong ka UDAN Yojana (Ude Desh ka Aam Nagrik), kaba thmu ban kyntiew ïa ka jingïadei ha ki thaiñ bad ban pynlong ïa ka jingleit jingwan da ka liengsuiñ kaba kham suk bad kaba lah ban siew dor.
