Shillong, Ïaïong 18
Ka Hockey India ha ka Lah Sngi U Blei ka la pynbna ïa ki 26 ngut ‘thei ïalehkai ka ri na ka bynta ka jingleit shim bynta sha Australia kaba la buh ban sdang naduh 26 tarik mynta u bnai haduh 4 tarik u Jymmang ha Perth Hockey Stadium.
Ha kane ka jingïakhun kaba don san tylli ki kynhun, ha kaba ka India kan ïakhun pyrshah ïa ka Australia A ha ki ar tylli ki jingïakhun ba nyngkong, nangta sa lai tylli ki jingïalehkai pyrshah ïa ka kynhun ba la rangbah (senior) jong ka Australia.
Ïa kane ka kynhun yn ïalam da ka nongïalehkai shapdeng ka Salima Tete, katba ka nongïalehkai shakhmat ka Navneet Kaur kan long kum ka vice-captain. Kane ka jingleit shim bynta ka long shi bynta ban pynkhreh ïa ka European leg jong ka FIH Pro League 2024-25, ka ban long ha u Jylliew mynta u snem.
Ka nongapkol ba kynsai ka Savita bad ka Bichu Devi Kharibam kin shim ïa ka jingkitkhlieh hapdeng jong ki, ban pynkhlaiñ ïa ka kynhun ha kane ka bynta.
Ha ka bynta kaba shadien la kynthup ïa ka Jyoti Singh, Ishika Chaudhary, Sushila Chanu Pukhrambam, Sujata Kujur, Suman Devi Thoudam, Jyoti, Ajmina Kujur, bad ka Sakshi Rana.
Ha ka bynta kaba shapdeng ki long ka kapten ka Salima Tete ryngkat ka jingkyrshan lang da ka Vaishnavi Vitthal Phalke, Neha, Sharmila Devi, Manisha Chauhan, Sunelita Toppo, Mahima Tete, Pooja Yadav bad ka Lalremsiami.
Katba ha ka bynta kaba shakhmat ki long ka Navneet Kaur, Deepika, Rutaja Dadaso Pisal, Mumtaz Khan, Baljeet Kaur, Deepika Soreng bad ka Beauty Dungdung.
Lah ban kdew ba ki san ngut nongïalehkai kita ka Jyoti Singh, Sujata Kujur, Azmina Kujur, Pooja Yadav bad ka Mahima Tete ki la paw kyrteng hapoh kane ka kynhun ïalehkai ba la rangbah (senior) ha ka sien kaba nyngkong eh.
Katba kiwei pat ki ‘thei ïalehkai kiba kynthup ïa ka Bansari Solanki (goalkeeper), Anjana Dundung, Lalthantluangi (defenders), Sakshi Shukla bad ka Khaidem Shileima Chanu (midfielders) ryngkat ka Dipi Monika Toppo bad ka Sonam (forwards) ki dei kiba la pynap lypa (standby).
Na ka liang u Harendra Singh, Coach jong ka kynhun ïalehkai ka ri u la ïasam ïa ki jingmut halor ka kynhun ïalehkai da kaba ong, “Kane ka jingleit sha Australia ka dei ka lad ïa ngi ban tynjuh bor bad ki kynhun ba kynsai.
Ngi la jied ïa ka kynhun kaba ïadei dur kaba pynïasoh ïa ka jingshemphang bad ka bor kaba thymmai. Ka long kaba sngewtynnad ban ïohi ïa ki nongïalehkai kiba don ïa ka mynsiem ïakhun. “Ngi la ïoh ïa ka jingïalehkai kilanmet ha Bengaluru, bad ka kynhun ka la long kaba biang ha ka bor met bd bor jabieng.
