Tehran, Iaiong:
Ka Iran ka don ha ka bynta kaba thmit ban pynmih ia u tiar ialeh thma (atom), la maham ka International Atomic Energy Agency, katto katne kynta shwa ba u heh jong ka UN Watchdog un leit sha Tehran. Ha kane ka jingleit jngoh jong u, u heh duh jong ka kynhun nuclear un pynlong ïa ka jingïakren bad ki heh sorkar Iran halor ki jingjia ba dang shen ha ka prokram nuclear ba rieh tam jongka.
U Rafael Grossi, uba dei u khlieh jong ka IAEA, u la ia nujor ia ka jingshna tiar nuclear bad ka jingpynbeit ia ka jigsaw puzzle bad u la ong ba ka Iran ka don lut ia ki bynta mynta, bad ka lah ban pynwandur bad pynurlong ia ki jingthmu ha kane ka sien.
Haba kren halor ka jingangnud jong ka Iran ban pynmih ïa ki tiar nuclear, u Mr Grossi u la ong ha ka kot khubor jong ka France, Le Monde, ba “Ka Iran, kam shim por shuh ban ioh ia u bom uba khlaiñ bor tam jongka”.
Ka IAEA, kaba dei ka kynhun jong ka UN kaba synshar hi dalade, mynta ka don ka kamram ban peit ia ka jingbud ryntih jong ka Iran ia ka jingiateh nuclear jong u snem 2015 kaba la hap noh hadien ba u Donald Trump u la weng noh na ka ha ka samoi ba nyng-kong jong u kum u President jong ka US. Ha katei ka por u President Trump u la khot ia ka kum ka “jingiateh ka bym long”.
