Beijing, Iaiong:
Da ka jingkyrshan jong u President ka US, Donald Trump ryngkat ka jingleit tur ba jur jong ka Russia na ka jingai jingkyrshan ba sop-sop jong ka China, ka Ukraine ka la jan duh bor ha kane ka thma kaba ka hap ban ïakhun pyrshah ia ki jingleit thombor jong ka Russia. Wat la katta, la ong ba ka China ka la kyntait ba kam shym la phah ia ki shipai jongka sha Russia lane kam shym la ai jingkyrshan eiei ia ka Russia ha ka jing-leit hiar thma sha Ukraine.
Hadien ka jingai jingmynjur jong u President ka Ukraine- u Volodymyr Zelensky, ka tnat shipai Ukraine ka la rai ban pyniaid paidbah ia kitei ki shipai ka China kiba la ioh kem da ka Ukraine hapdeng ka jingiakhun pyrshah bad ki shipai jong ka Russia.
Dang ha kane ka taïew ba la lah, u Zelensky u la ong ba ki don kumba 150 tam ki shipai ka China kiba ïakhun na ka bynta ka Russia bad kiba don hapoh u pud- u sam jong ka Ukraine. Utei u nongialam jong ka Ukraine, u la ong ba ka Russia ka tan jubor ia ka China ba kan iasnoh kti lang bad ka ha kane ka thma bad ha kajuh ruh ka por, u la ther tyngeh bad pynrem jur ruh ia ka China ba ka leit ailad ia ki nongshong shnong jongka, ba kin ïakhun na ka bynta ka Russia.
U Zelensky u la pynshisha ruh ia kane da kaba pyntip ba ka Ukraine ka la ioh jingtip shai ba ki don palat 150 tam ki nongshong shnong ka China, kiba ïakhun naka bynta ka Russia bad kiba ka Ukraine ka la ioh kem noh ia 2 ngut napdeng jong kitei ki nong China kiba la shah pyndonkam bakla da ka Russia.
