Chennai, ïaïong:
Ka jingkren kaba skhem jong u General Secretary ka AIADMK u Edappadi K Palaniswami ha ka sngi Balang ba ka seng jong u kan ym thaw sorkar synrop bad ka BJP ha shwa ka jingïalang kaba la buh ban long ha ka 2 tarik, Jymmang.
Ka jingpynkynmaw biang ïa kajuh hadien kata da uwei na ki heh nongïalam jong ka seng bad u MP ka Rajya Sabha u M Thambidurai la pdiang da ki briew kiba don hapoh ka seng kum ki lad ki lynti ban pynthikna ba ka jingïalang jong ka komiti treikam jong ka seng kan long kaba ïaid beit khlem kano-kano ka jingpynpaw paidbah ïa ka jingsngewsih halor ka jingïasoh jong ka AIADMK sha ka BJP ha ka sngi Thohdieng.
Ka jingkren jong u Palaniswami ha ka sngi Balang ka la wan kum ka jingkyndit namar ba u la pyrshah ïa ka jingkren jong u Shah ha ka jingïalang bad ki nongthoh khubor ba la pynbna ïa ka jingïatreilang ha ka 11 tarik, Ïaïong, ba ka NDA kan thaw ïa ka sorkar synrop ha u snem 2026 hapoh ka jingïalam jong u Palaniswami ha Tamil Nadu.
Katba ka AIADMK ka la ïasoh biang bad ka jingïatylli hadien 20 bnai ka la long kumba ka la wanrah ïa ka jingduh jingkyrmen hapdeng kawei ka bynta jong ka seng, ïa ka jingpynbna jong u Shah shaphang ka sorkar synrop khamtam ym shym la shim bha da kiba bun ki nongtrei jong ka seng kiba ka TNIE ka la ïakren bad ki, namar la shim ba ka long kum ka jingailad kaba khraw ïa ka kynhun jong ka ri bad ka kynhun jong ka seng.
Ka AIADMK kam pat ju ailad ïa ka jingmut jong ka sorkar synrop ha ki por ba la leit noh.
U Myntri barim u Sellur K Raju ha ka 13 tarik, Jymmang u la pynpaw ïa ka jingsngewsih ha ki lad pathai khubor halor ka jingmut jong ka sorkar synrop.
U Raju u la ong ba ki nongïalam ka BJP ki lah ban ong “kiei kiei kiba hajar bad kiba pher”, hynrei ka jingïeng kaba ka AIADMK ka shim kan long kaba kut.
Ki briew kiba don hapoh ka seng ki la ong ba kan long ka kam kaba eh ïa u Palaniswami ban die noh ïa ka jingïateh lok, lymne ïa ka jingmut jong ka sorkar synrop, ha ka jingïalang jong ka komiti treikam haba ka don ka jingkynthoh na ki kynhun pyrshah ba ka AIADMK ka shah pyndem ha ka jingpynbor ba la buh da ka seng riewlum.
Uwei na ki riew pawkhmat uba don bynta ha ki kam ba kongsan jong ka seng u la ong, ym kum kiwei pat ki jingïalang, ka komiti treikam kaban sa wan, kaba yn ïashim bynta da ki Secretary jong ki distrik, ki MLA, ki MP bad kiwei kiwei ki heh nongtrei, la khmih lynti ba kan long kaba jynjar namar ba ki nongïalam jong ka seng kim shym la shim ïa ka komiti ha ka jingshaniah shwa ban pynkut noh ïa ka jingïalang. Tang katto katne ngut ki nongïalam ba hakhliehduh la buh ha ka kynhun, u la ong.
“Kumta ki nongïalam ka seng mynta ki pynsngew ïa ka khubor sha ki nongtrei ha ka kyrdan distrik ba ïa ka jingïateh lok la thaw thok ha ki kyndon kiba donburom bad ba ïa ka jingmut jong ka sorkar synrop ym shym la pdiang”, u la ong.
Ka jylla jong ka BJP ka la bteng ban pynduna ïa kane ka jingjia, da kaba pynpaw ba tang u Shah un ai jingmut halor kane ka kam.
Ha kajuh ka por, ka tnad treikam jong ka AIADMK ka la pynmih ïa ka hukum ba ki nongkitkam jong ka seng kim dei ban ai jingïakren ne ai jingmut ha kaba ïadei bad ka jinglong jong ka seng halor ki mat sha ki lad phah khubor, ki Social Media, ki kot khubor bapher bapher bad kiwei kiwei ki lad pathai khubor khlem da don ka jingai jingmynjur na ki nongïalam.
