Bengaluru, ïaïong:
U Myntri Rangbah ka Karnataka, Siddaramaiah, ha kine ki khyndiat sngi ba la leit, u la thoh sha u Rahul Gandhi, nongïalam jong ka Congress, ha kaba u la pyntip ba u la bthah ïa u nongai jingmut ha ka liang ka aiñ bad ka kynhun jong u, ba kin pynkhreh ïa ka Draft jong ka Rohith Vemula Act, ka aiñ ka ban long kum ka lad ban khanglad ïa ka jingshah leh beiñ ha ki jaka pule.
Kane ka sienjam ka long hadien shisngi ba u Siddaramaiah u la ong ba ka sorkar jylla ka ïeng skhem ha ka jingkut jingmut jong ka ban pynjari noh kloi ïa ka Rohith Vemula Act ha Karnataka, hadien ba u Gandhi u la kyntu ïa u ban pynjari noh ïa kane ka aiñ ban pynthikna ba ym don mano mano ba mad ïa ka jingshah lehbeiñ jaitbynriew ha ka rukom pule puthi.
“Ka jingkdew ha ka shithi jong phi kaba la thoh ha ka 16 tarik, Ïaïong, 2025, shaphang ka jingjia kaba u Dr B R Ambedkar u la ïakynduh, kumba la ïathuh da u, ka long shisha ka jingshisha kaba sngewsih wat haduh kine ki sngi. Ym don u khynnah ne u rangbah uba dei ban ïakynduh ïa ka jingshah lehbeiñ bad jingshah niewbeiñ kaba u Babasaheb u ïakynduh,” la ong u Siddaramaiah ha ka shithi jong u sha u nongïalam ka Congress.
Da kaba pynthikna ba ma u bad ka sorkar jong u ki thmu ban pynthikna ïa ka imlang-sahlang kaba ïaryngkat bad kaba ïaryngkat, u Myntri Rangbah ka Karnataka u la ong, “Ngi dei ban ïatreilang ban wanrah ïa ki jaitbynriew Dalit, Adivasi bad ki jaitbynriew kiba sahdien sha ka lynti kaba kongsan. Ba ki jaitbynriew ba shah pynshitom beiñ kim dei shuh ban ïakynduh ïa kano kano ka jingshah lehbeiñ ha ka rukom hikai jong ngi.”
“Nga la bthah ïa u Legal Advisor bad ka kynhun jong nga ban pynkhreh ïa ka Draft jong ka Rohith Vemula Act, ka aiñ ka ban trei kum ka lad ban khanglad ïa ka jingshah lehbeiñ ha ki jaka pule,” u la bynrap.
Ha ka shithi jongu sha u Myntri Rangbah, u Gandhi u la kdew ïa ka jingshah lehbeiñ u BR Ambedkar ha ka jingim jong u bad u la ong ba u Siddaramaiah un mynjur ba kaei kaba u Ambedkar u la mad ka long kaba lehraiñ bad ym dei ban shah da uno uno u khynnah ha India.
“Ka long kaba sngewlehraiñ ba wat haduh kine ki sngi da ki Million ki samla pule na ki jaitbynriew Dalit, Adivasi bad OBC ki hap ban mad ïa kum kane ka jingshah lehbeiñ kaba shyrkhei ha ka rukom hikai jong ngi,” u la ong.
“Ka jingpynïap ïa ki samla kiba stad kum u Rohith Vemula, u Payal Tadvi bad u Darshan Solanki ka long kaba ym lah ban pdiang. Ka la dei ka por ban pynkut noh ïa kane. Nga kyntu ïa ka sorkar Karnataka ban pynjari ïa ka aiñ Rohith Vemula khnang ba ym don uwei ruh u khun jong ka ri India uba hap ban shah ïa kaei kaba u Dr B R Ambedkar u la la shah, u Rohit Vemula bad ki Million ngut kiwei pat ki la ngat ïa ka jingshah shitom,” la ong u nongïalam jong ka liang pyrshah ha Lok Sabha ha ka shithi jong u.
U Rohith Vemula, uba dei u samla pule Dalit, u la khlad noh da kaba pynïap ïalade namar ka jingshah lehbeiñ ha ka jingsngew ïapher jaitbynriew ha u snem 2016.
