Shillong, Ïaïong 22
Ka Tura District Cricket Association ka la ïoh jingjop ha kaba sdang ïa ka Zone 2 jong ka MCA U-16 Boys Inter-District Tournament 2025 ha Mendipathar ha ka Sngi Ba-ar ha kaba ka la pynliem noh ïa ka North Garo Hills DCA da 5 wiket ha ka jingïakhun kaba duna bha ki jingïoh run.
Ha kane ka jingïakhun, ka Tura ka la jop kynting pisa bad ka la jied ban kawang bol nyngkong. Ki nongkawang bol kane ka kynhun ki la lah ban ïalehkai bha ha kaba ki nongtied ka NGHDCA ki la shah pynkhyllem baroh ki wiket na ka bynta tang 39 run ha ki 18.1 over. U Chingjring K. Marak (12) u la long nongtied uba la ïoh bun eh. Katba ki nongkawang bol ka Tura kata u Aniket Poddar u la pynhap 4 wiket ha ki 7 over, kumjuh u Doangkam Ch Marak (3/9 ha ka 3.1 over) bad u Ishan Saha (3/16 ha ki 6 over).
Ki nongtied ki la bteng ban ïakynduh jingeh ha kane ka jingïakhun, ha kaba ym don uwei ruh u nongïalehkai ka Tura uba la lah ban tam palat ïa ka 7 run, hynrei 17 tylli ki wide na ka NGH ki la ïarap ïa kine ka kynhun, ha kaba ka TDCA ka la lah ban kynjoh sha ka thong da kaba ka la tied 40 run bad shah pynhap 5 wiket ha ki 16.4 over. U Chingjring ka la khur 3 wiket ha ki 2.4 over, hynrei dei u Aniket ka TDCA uba la ïohpdiang ïa ka nam Player of the Match.
Ki jingïakhun jong ka Zone 1 ki la sdang ha Mukhla Mission, West Jaiñtia Hills ha ka 15 tarik mynta u bnai. Ha ka Group-A jong ka Zone 1 ka kynthup ïa ka Shillong Cricket Association ‘A’ (SCA-A), SCA-B, East Jaiñtia Hills DCA, South West Khasi Hills DCA bad ka West Khasi Hills DCA. Katba ha ka Group-B ka kynthup ïa ka Ri-Bhoi DCA, East Khasi Hills CA, Eastern West Khasi Hills DCA bad West Jaiñtia DCA.
Ha ka Zone 2 la pynbeit ban don tang kawei ka group kaba don saw tylli ki kynhun kata ka East Garo Hills DCA, North Garo Hills DCA, South Garo Hills DCA bad Tura DCA.
