Shillong, Nailar 07
Ka All India Football Federation (AIFF) ha ka sngi Palei ka la tyrwa ba kan pynlong da kane ka lympung ïalehkai Super Cup naduh shiteng jong u Nailur mynta u snem, da kaba thmu ban ailad ïa ki klob jong ka Indian Super League ïa ki jingïakhun kiba biang hapdeng ka jingbym thikna ïa ka tarik ban sdang ïa ka aiom ïalehkai ISL.
Kane ka jingtyrwa ka la mih ha ka jingïakynduh bad ki nongmihkhmat jong ki 13 tylli ki klob ISL kiba la pynpaw ïa ka jingsngewkhia halor ka jingpynsangeh noh ïa ka samoi ban wan namar ki jingeh ha kaba ïadei bad ka jingpynthymmai ïa ka Master Rights Agreement.
Ki nongmihkhmat na ka Mohun Bagan Super Giant, East Bengal, bad Odisha FC ki la ïashim bynta lyngba ka ‘video conference’ ha kane ka jingïalang, katba ki nongmihkhmat na kiwei pat ki 10 tylli ki klob jong ka ISL ki la ïashim bynta da lade ha New Delhi.
“Ka AIFF ka tyrwa ba kan pynlong da ka Super Cup ka ban sdang naduh ka taïew kaba ar ne kaba lai jong u Nailur ban pynthikna ba ki klob jong ka ISL kin ïoh ïa ki jingïalehkai kiba biang. Ka AIFF bad baroh 13 tylli ki klob jong ka ISL ryngkat lang ki la shim ïa ka rai na ka bynta ka jingmyntoi jong ka ri. Ngin sa ïakynduh biang hadien 7 haduh 10 sngi bad ngin sa shim ïa ka rai kaba khatduh,” la pynpaw u President ka AIFF u Kalyan Chaubey.
“Ngi kyrmen ban don ïa ka ISL mynta ka samoi watla ka lah ban long kaba slem khyndiat. Hynrei ngi lah ban leh da ki katto katne ki jingkylla, ka lah ban long ha ka rukom ïalehkai ne kiwei kiwei. Hynrei ïa kata yn sa rai hadien, ym pat don rai halor kita kiei kiei haduh mynta,” la bynrap biang u Chaubey ha kaba ïadei bad ka jingbym thikna jong ka ISL.
Ka Super Cup kaba ju pynlong ha kaba kut jong ka samoi ïalehkai, mynta ka lah ban sdang nyngkong ïa ka samoi ïalehkai. La khmih lynti ba kane ka lympung kan pynkut noh hashwa ba ka India kan pynkhreh ïa ki jingïalehkai jong ka AFC Asian Cup qualification pyrshah ïa ka Singapore ha ka 9 bad 14 tarik u Risaw.
Ka Indian Super League ka la ju long naduh u Nailur haduh u Ïaïong. Ka jingïateh kular ba mynta hapdeng ka Football Sports Development Limited, ka nongpynïaid ïa ka ISL, bad ka AIFF kan kut noh ha ka 8 tarik u Nohprah, 2025.
Kane ka jingbym thikna ka la ktah ïa ki katto katne ki klob. Ka Chennaiyin FC ka la pynbna ban sangeh shipor ïa ki jingïalehkai jong ki rangïalehkai bad ki nongtrei jong ka kynhun ba nyngkong jong ka ha ka sngi Balang, bad kane ka la wan jia kumjuh ïa ka Bengaluru FC bad ka Odisha FC.
Kane ka rai halor ka por ban pynlong ïa ka Super Cup ka wan kum ka jingkynthoh ïa ka jinglong jingman kaba don mynta ha kaba ïadei bad ka lawei jong ka ISL. Ka synjuk bad ki klob ki dang ïaleh ban pynthikna ba ka jingïalehkai phutbol kaba ïakhun kan dang ïai bteng wat hapdeng ki jingeh bad ka jingpynbeit jong ka lympung.
La khmih lynti ba ki nongmihkhmat jong ka AIFF bad ki klob kin ïakynduh biang hapoh 7-10 sngi ban pyndep ïa ki jingpynbeit bad ban shim ïa ki rai kiba skhem shaphang ki rukom ïalehkai bad ki por jong baroh ar tylli ki lympung ïalehkai.
