Shillong, Nailar 07
Ka sorkar Jylla ka la rai ban thied ïa ka jaka kaba ha ka jingheh kaba 14 akar lyngba ka Meghalaya Industrial Development Corporation (MIDFC) na ka bynta ban tei ïa ka jaka ïalehkai kinglieng ne Slalom ha wah Umtham kaba ha Ri Bhoi District.
Kane ka projek ka thmu ban kyntiew ïa ki jingïalehkai kinglieng kum ka Slalom, Canoeing bad Kayaking hapoh ka Jylla.
Kane ka rai ka la wan hadien ba ka Jylla ka la lah ban khur san tylli ki takma ha ka sien kaba nyngkong eh ha ka 38th National Games kaba la kut dangshen mynta u snem ha Uttarakhand lyngba ki nongkinglieng. Kine ki kynthup ïa ka takma ksiar na u Vikash Rana, kumjuh ki takma rupa na ka Elizabeth Vincent bad u Indra Sharma, katba ki takma rnong na u Pynshngaiñ Kurbah bad ki ar ngut kata ka Kiran Devi & B. Anandhi.
“Kane kan long tang kawei na ki jait jingïalehkai ha ka ri baroh kawei ynda la pyndep pura yn sa lah ban pynlong ïa kane ka jingïalehkai kinglieng ha katei ka jaka,” la pynpaw u Myntri Rangbah ka Jylla u Conrad K. Sangma ha ki lad pathai khubor hadien ba la kut ka jingïalang ka kynhun myntri ha ka sngi Palei.
“Ka don kumba 14 akar ka jaka kaba kynthup kumba 8-9 akar ka jaka thung dieng ha shiliang ki surok kaba dangwan kum ka ‘package’,” u la bynrap da kaba ong ba ka sorkar kan pynlut kumba T. 21 klur tyngka ban thied ïa katei ka jaka.
“Namarkata, ngi thrang bha ban kyntiew ïa kane jingïalehkai bad ngi la rai ban tei ïa ka jaka ïalehkai kaba biang pura na ka bynta ka Slalom ha wah Umthan kaba ha Ri Bhoi.”
Kane ka jaka ïalehkai kan long tang kawei hapoh ka ri, ka ban plie lad ïa ki nongïalehkai kiba don sap ba kin ïoh ki jingshah hikai bad ruh ban ïashim bynta,” la bynrap u Sangma.
