Shillong, Nailar 07
Ka Mawlai SC ka la pynjem khnap haduh 6-2 kol ïa ka Sawmer SC ha ka jingïakhun kaba nyngkong jong ka, ha ka Shillong Premier League ha ka sngi Palei ha SSA Stadium, First Ground, Polo.
Kane ka la wan urlong lyngba u Ricky Chyne (17′), Kevin Rymbai (18′, 57’P), Balajied Syiemlieh (23′) bad u Robert Khong -riah (49′, 81′), katba na ka Sawmer SC la thep da u Enestar Malngiang (68′, 79′)
Kumban shu phaidien, ba ha ka samoi ialehkai u snem ba la dep, ka Mawlai SC ka la lah ba kan pynliem ar sien lynter ïa ka Sawmer, kiba da long salit bha, kaba pynlong ïa ka Mawlai ba kan jam shakhmat bad ban lah ban bat ïa ka kyrdan kaba ar, katba ka Sawmer ka la ïoh ban bat ïa ka kyrdan kaba phra bad lait na ka jingshah pynhiar na kane ka lympung jong ka SPL.
Haba phai biang sha ka jingïakhun, naduh kaba sdang ka Mawlai SC, ka la kyntiew bha ïa la ka rukom ïalehkai ka jong ka, katno tam lei lei hadien ba kham bun na ki snar ïalehkai ka samoi kaba la dep, ki la mih na kane ka kynhun, kaba pynlong ïa ka klob ryngkat u coach Bah Hering Shangpliang ban hap ban thaw bad shna pynwandur thymmai biang ïa la ka jong ka kynhun, kaba hynne hi ka janmiet, ka sur ïalehkai jong ki rangïalehkai, kam lah ban khlem da pynkren briew.
Hpdeng kane ka sur ïalehkai bha, ba ka pynlong ïa ka Mawlai ba tang hapoh 23 minit, ka la lah ba kan tam shakhmat da lai kol bad ka la ïai bteng ba kan tam shuh shuh da 5-0, ha shwa ba ka kynhun ïalehkai ka Sawmer SC kan ïoh ïa ka kabu ksiar ban pynphai ïa ka kol ba nyngkong.
Hadien kane, na ka liang u Bah Hering bad u Bah Arki Mylliemumlong (coach ka Sawmer SC) ki la wanrah ïa ka jingkylla ban bujli ïa ki rangïaleh-kai, kaba hangne, marsien wanrah ïa kum kine ki jingkylla, ba ka Sawmer SC ka la lah ba kan kham kyntiew ïa la ka rukom ïalehkai ka jong ka, katba na ka liang ka Mawlai SC pat ka la kham kynran dien bad ba la shu ïaleh kat ba lah ban tehlakam ïa ka bol.
Kumta ha kaba kut jong ka miet, ka Mawlai SC kan hun ka mynsiem ka jong ka ïa ka rukom ïalehkai ki rangïalehkai ha ka jingïakhun kaba nyngkong, katba na ka liang ka Sawmer SC, kan hap ba kan kham trei shitom lada ka thrang ban tbeh lem shakhmat na ki jingïakhun kiban dang wan ki jong ka.
Na ka liang ka SSA ka la pynbna ba kan bteng biang ïa kane ka jingïalehkai haduh ka 12 tarik hapdeng ka Langsning FC pyrshah ïa ka Mylliem.
